«Qazgidromet» RMK basshysy Marina Shmidt qysta Qazaqstan aýmaǵynda aýa raiy qandai bolatynyn aitty, dep habarlaidy "Ult aqparat".
«Biyl qarasha aiynda elimizde aýa temperatýrasy klimattyq normadan 1 gradýs joǵary bolmaq. Tek elimizdiń batysy men shyǵysynda aýa temperatýrasy normaǵa sáikes bolady. Respýblikamyzdyń basym bóliginde bir aiǵa jýyq kólemindegi jaýyn-shashyn mólsheri normaǵa sáikes bolsa, Ońtústik Qazaqstannyń shet jaǵynda normadan asady. Al ońtústik-batysynda normadan tómen bolady», - dedi «Qazgidromet» basshysy.
Atap ótilgendei, qystyń alǵashqy eki aiy – jeltoqsan men qańtarda aýa raiy salystyrmaly túrde jyly bolady.
«Aýa temperatýrasy klimattyq normadan 3-5 gradýsqa tómen kúnder de bolady. Jeltoqsan aiy jaýyn-shashyndy bolatyny kútilse, aqpan aiynda elimizdiń basym bóliginde klimattyq normadan 1-2 gradýsqa tómen temperatýra ornaidy», - deidi ol.
Aqpan aiynda elimizdiń ońtústik-batys bóliginde jaýyn-shashyn az túsedi, al soltústik-shyǵysta onyń mólsheri - normaǵa sai.
M.Shmidtiń aitýynsha, qarasha aiynda sinoptikalyq qubylystardyń aralasýy bolmasa qar, jel, kóktaiǵaq kútýge bolady.
«Biyl qys mezgili salystyrmaly túrde – jyly. Aqpan aiynda ǵana aýa temperatýrasy normadan 1-2 gradýs tómen bolýy múmkin», - deidi «QazGidromet» RMK basshysy.
