Bailanys sapasyn monitoringileý boiynsha 17 jyljymaly ólsheý kesheni satyp alynýda. Bul týraly Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin málim etti, dep habarlaidy QazAqparat.
«Internet sapasyna halyqtyq baqylaý júrgizý úshin Bailanys bar servisi (https://bailanys.bar/kk/internet/speedtest) iske qosyldy. Kez kelgen azamat smartfon arqyly internet kemshilikterin bizge ońai túrde joldai alady. Qazirgi ýaqytta tekserý boiynsha 50 myńnan astam adam atalǵan servisti paidalandy», - dedi ministr tsifrlandyrý taqyryby boiynsha Senatta ótip jatqan Úkimet saǵatynda.
Onyń sózine qaraǵanda, memlekettik baqylaý maqsatynda bailanys sapasyn monitoringileý boiynsha 17 jyljymaly ólsheý kesheni satyp alynýda.
«Bul baǵytta Premer-Ministr qoldaý bildirdi. Jyldyń sońyna deiin osy keshenderdi satyp alamyz. Osy oraida halyqtyq jáne memlekettik baqylaýdyń derekteri biryńǵai júiege jinaqtalatyn bolady, bul odan ári operatorlarmen jumys isteýge múmkindik beredi», - dedi B. Mýsin.
Budan buryn habarlanǵandai, ministr elimizde internettiń sapasyna qatysty túsinik berdi.
«Nege internet álsiz? Buǵan qatysty birneshe sebep bar. Birinshiden, bizde internet sapasy boiynsha qatań zańnamalyq talaptar joq. Ekinshiden, telekommýnikatsiia jelisiniń 90 paiyzy radiorelelik jelide jáne áýe bailanys arnalary boiynsha salynǵan», - dedi Baǵdat Mýsin.
