«Qazaq tili» qoǵamynyń Ortalyq keńesiniń jańa quramyna QR Parlamentiniń qos palatasynyń depýtattary men filial tóraǵalary jáne ziialy qaýym ókilderinen quralǵan 47 adam sailandy. Al Ortalyq keńes basqarmasynyń jańa quramyna 18 adam sailanyp, qyzmetke kiristi, dep habarlaidy QazAqparat.
Túrkistanda ótken qoǵamnyń VI quryltaiynda Memlekettik hatshy Qyrymbek Kósherbaev QR Tuńǵysh Prezidenti, Elbasy Nursultan Nazarbaev pen QR Prezidenti Qasym-Jomart Toqaevtyń quryltaiǵa arnalǵan quttyqtaý hattaryn oqyp berdi. Sondai-aq qazaq tiliniń qoldanylý aiasyn keńeitý úshin mańyzdy jumystar jalǵasatynyn, eldi biriktiretin faktor memlekettik til ekenin atap ótti. Prezident ákimshiligi men el úkimeti tarapynan qazaq tiliniń mártebesin kóterýge barynsha qoldaý kórsetile beretinin málimdedi. Memlekettik til saiasatyn tiimdi iske asyrý baǵytyndaǵy josparlardy saralap, tiisti tapsyrmalar men josparlardy bekitti.
«Bul quryltaidy Túrkistanda ótkizýimizde mán bar. Elbasynyń tarihi sheshimimen Túrkistan oblysy qurylyp, Túrkistan qalasy oblys ortalyǵy retinde damyp keledi. Qyrýar jumys atqarylyp jatyr. Sizder – el aldynda júrgen azamatsyzdar. Elordany kórip júrsizder, bul joly Túrkistannyń jańa kelbetin kórsin, qýansyn dep quryltaidy osynda uiymdastyrýdy jón kórdik», – dedi Q.Kósherbaev.
Keleli basqosýda «Qazaq tili» qoǵamynyń atqarǵan jumysy boiynsha Ortalyq keńesiniń esebi tyńdaldy. Qoǵam filialdarynyń basshylary da baiandama jasap, óz usynystaryn bildirdi. Sonymen birge qoǵamnyń jańa baǵdarlamasy men jarǵysy qabyldandy. Quryltaida delegattardyń ashyq daýys berýi arqyly halyqaralyq «Qazaq tili» qoǵamynyń prezidenti bolyp sailanǵan QR Parlamenti Májilisiniń depýtaty Berik Ábdiǵaliuly memlekettik tildi tuǵyryna tolyq qondyrý baǵytynda jumys kúsheietinin jetkizdi.
«Qazaq tiliniń máselesin qazaq tildi ortada ǵana talqylai bermei, orys tildi ortada da talqylap, memlekettik tildiń mańyzdylyǵyn kei aǵaiyndarǵa túsindirý kerek. Qazaqstannyń árbir azamaty qazaq tilin bilýge mindetti», – dedi ol.
Quryltai barysynda óńirlerde qoǵam filialdarynyń jumysy kúsheitilip, bas keńse Almatydan Nur-Sultanǵa kóshiriletini aityldy. Bas uiym men filialdardyń jumys jospary bekitildi. Sondai-aq jiyn barysynda «Qazaq tili» qoǵamdyq birlestiginiń Qyzylorda oblystyq filialynyń tóraǵasy Sádýaqas Ańsat «Parasat» ordenimen, A.Baitursynuly atyndaǵy Til bilimi institýtynyń direktory, ǵalym Anar Fazyljanova «Qurmet» ordenimen marapattaldy. Olardy Memlekettik hatshy Q.Kósherbaev arnaiy marapattap, qazaq tiline qosqan úlesteri úshin alǵysyn bildirdi.
Mańyzdy basqosýda QR Parlamenti Májilisiniń depýtaty Gennadii Shipovskih áleýmettik jeliler men ǵalamtorda qazaqsha kontentterdi kóbeitip, jastardyń suranysyn qanaǵattandyrý kerek degen pikirin bildirse, qoǵam qairatkeri Orazkúl Asanǵazy men til janashyry Asyly Osman memlekettik tildi tolyq tuǵyryna qondyrýǵa keri áserin tigizip otyrǵan faktorlarǵa toqtalyp, qazaq tiliniń bolashaǵy úshin naqty jumystar atqarylýy kerektigin jetkizdi.
Túrkistan oblysynda 2 kúnge sozylǵan quryltaiǵa qatysýshylar Arystan bab pen Qoja Ahmet Iasaýi kesenesine ziiarat jasap, babalar rýhyna taǵzym etti. Osy saparda delegattar til janashyrlary ári qoǵam qairatkerleri Ózbekáli Jánibekov pen Ómirzaq Aitbaevty eske aldy. Jiynǵa qatysýshylar Túrkistandaǵy oń ózgeristerge rizashylyqtaryn bildirip, quryltaidaǵy mańyzdy bastamalardy júzege asyrýǵa bar kúshterin salatyndaryn jetkizdi.
