Kaspii teńizinde áskeri qyzmetshiler qaza tapqan qaiǵyly oqiǵadan keiin Mańǵystaý oblysyndaǵy aýa raiy boljamy nazarǵa ilikti, dep habarlaidy ult.kz.
Bul týraly aqtaýlyq bloger Azamat Sánsenbaev aitty. 24 qyrkúiekte Qazgidromet óńirde qolaisyz aýa raiy kútiletinin aityp, daýyldy eskertý jariialaǵan. Boljam boiynsha, oblystyń batysy, soltústigi jáne ortalyǵynda ońtústik-shyǵystan soqqan jeldiń ekpini 15–20 m/s-qa deiin jetýi múmkin bolǵan. Sonymen qatar soltústik pen ortalyq aýdandarda shańdy daýyl bolýy yqtimal ekeni eskertilgen.
Sinoptikter 25 qyrkúiekke jasaǵan boljamda da oblystyń soltústik-batysynda jańbyr men naizaǵai kútiletinin habarlaǵan. Túnde jeldiń ekpini 15–18 m/s-qa deiin kúsheiýi múmkin bolǵan.
Áskeri qyzmetshilerdiń qazasynan keiin áleýmettik jeli qoldanýshylary oqiǵany óńirdegi qolaisyz aýa raiymen bailanystyra bastady. Keibir azamattar daýyldy eskertýge qaramastan oqý-jattyǵý ótkizý týraly sheshim qabyldaǵan jaýapty tulǵalardyń áreketine quqyqtyq baǵa berilýi kerek degen pikir bildirdi.
Alaida áskeri qyzmetshilerdiń qaza bolýyna aýa raiynyń naqty áseri bolǵan-bolmaǵany ázirge resmi túrde aitylǵan joq. Oqiǵanyń sebepterin anyqtaý úshin Úkimettik komissiia jumys istep jatyr.
