Kaspii teńizindegi áskeri oqý-jattyǵý kezinde bolǵan qaiǵyly oqiǵadan keiin ustalǵan Áskeri-teńiz kúshteri bas qolbasshysynyń birinshi orynbasary Daniiar Hairýshevtiń áieli áleýmettik jelide málimdeme jasady, dep habarlaidy ult.kz.
Ol tergeý aiaqtalmai turyp jubaiyn kináli dep ataýǵa bolmaitynyn aityp, isti jan-jaqty ári obektivti qaraýdy surady.
«Meniń kúieýim kináli emes. Ol búkil ómirin Otanǵa qyzmet etýge arnady jáne osy jyldar boiy óz mindetin abyroimen atqaryp keldi. Ony bireýdiń sózine nemese joramaldaryna súienip aiyptamai, aldymen óz ýájin aitýǵa múmkindik berý kerek», – dep jazdy ol.
Hairýshevtiń áieli kúieýine erekshe jaǵdai jasaýdy suramaitynyn, tek tergeýdiń ádil júrgizilýin qalaitynyn aitty.
«Eger oǵan qatysty qandai da bir talap nemese aiyp bolsa, ol naqty aitylyp, faktilermen rastalýy kerek. Barlyq mán-jai anyqtalǵanǵa deiin asyǵys qorytyndy jasamaýdy, onyń ar-namysy men qadir-qasietine nuqsan keltirmeýdi jáne ony kináli dep atamaýdy suraimyn», – dedi ol.
Onyń aitýynsha, otbasy tergeý aiasyndaǵy ashyq áńgimege daiyn. Alaida bul protsess zań talaptary men adamǵa degen qurmet saqtalǵan jaǵdaida júrgizilýi kerek.
Buǵan deiin Qorǵanys ministrligi Daniiar Hairýshevtiń ustalǵanyn rastaǵan edi. Ol Kaspii teńizindegi áskeri oqý-jattyǵý kezinde bolǵan qaiǵyly jaǵdaiǵa qatysty qozǵalǵan qylmystyq is boiynsha kúdiktilerdiń biri.
Aita keteiik, Daniiar Hairýshev biyl mamyr aiynda áskerdiń joǵary jaýyngerlik ázirligin qamtamasyz etýge qosqan úlesi men qyzmettegi jetistikteri úshin Baýyrjan Momyshuly atyndaǵy II dárejeli «Aibyn» ordenimen marapattalǵan.
