Kaspii teńizinde bolǵan qaiǵyly jaǵdaidan aman qalǵan sarbaz Aqjol Temerhannyń anasy Samal Keýelova uly men qaza tapqan sarbaz Azamattyń arasyndaǵy dostyq týraly áserli jazba jariialady, dep habarlaidy ult.kz.

Samal Keýelovanyń aitýynsha, aýyr jaraqat alǵan Aqjol aýrýhanaǵa jetkizilgen sátte de qaza tapqan dosynyń beretin qolynan bir sátke bosatpaǵan. Ol jedel járdem kóliginde de, aýrýhananyń qabyldaý bóliminde de beretti ózinde ustap otyrǵan.

“Bul – Azamattiki. Ózim beremin, bermeimin…” – dep Aqjol dosynyń zatyn eshkimge bergisi kelmegen.

Anasynyń jazýynsha, bul kórinis meditsina qyzmetkerlerin de beijai qaldyrmaǵan. Dárigerler men feldsherler sol sátti kózine jas alyp eske túsirgen.

“Analiz de ala almadyq. Beretti sipap otyryp, bárimizdi jylatty”, – degen meditsina qyzmetkerleri.

Samal Keýelova ulynyń basynan ótken osy bir sátti shynaiy dostyq pen adaldyqtyń kórinisi dep baǵalady. Onyń aitýynsha, ol perzentterine árdaiym ómir jolynda adal dos kezdesýin tilep kelgen.

Al Aqjoldyń qaza tapqan joldasynyń beretin qolynan shyǵarmai, aýrýhanaǵa deiin alyp kelýi ana úshin dostyqtyń sózben aityp jetkizý qiyn belgisine ainalǵan.

Ol ulynyń qolyndaǵy beret endi jai ǵana áskeri bas kiim emes, eki sarbazdyń arasyndaǵy adal dostyqtyń esteligi bolyp qalǵanyn jetkizdi.

2026 jylǵy 24 qyrkúiekte Kaspii teńizinde áskeri oqý-jattyǵý kezinde qaiǵyly oqiǵa boldy. 14 sarbaz qaza taýyp, úsheýi aman qaldy.

Oqiǵa qalai bolǵan?

Mańǵystaý oblysynda áskeri qyzmetshiler teńizde oqý-jattyǵý ótkizip jatqan. Sol kezde aýa raiy kúrt buzylyp, qatty jel soqqan.

Saldarynan 17 áskeri qyzmetshini teńizge aǵyzyp áketken. Olardyń 14-i qaza taýyp, úsheýi qutqaryldy.

Aqjol qalai aman qalǵan?

19 jastaǵy sarbaz Aqjol Temerhan teńizde dosy Azamatpen birge bolǵan.

Ákesiniń aitýynsha, Aqjol sýǵa ketken dosyn shamamen jarty saǵat izdegen. Alaida sý jutyp, basy ainalǵan soń jaǵaǵa óz kúshimen júzip shyqqan.

Ol aýrýhanaǵa aýyr jaǵdaida jetkizilgen. Qolynda qaza tapqan dosy Azamattyń bereti bolǵan. Aqjol ony eshkimge bergisi kelmegen.

Oqiǵadan keiin ne boldy?

Qaiǵyly jaǵdaiǵa bailanysty eki qylmystyq is qozǵaldy. Qorǵanys ministrligi júiesiniń bes laýazymdy qyzmetkeri kúdikti retinde ustaldy.

27 qyrkúiekte Qorǵanys ministri Dáýren Qosanov qyzmetinen bosatyldy.

Sońǵy málimet boiynsha, Aqjol aman qalyp, emdelgennen keiin merzimdi áskeri qyzmetin aiaqtaǵan.