Tanymal prodiýser Gúlzira Aidarbekova qazaqstandyq óner juldyzdarynyń kásibin synǵa alǵan mamannyń pikirine jaýap berdi. Ol áleýmettik jelidegi jazbasynda ózgeniń eńbegine min taqqansha, aldymen jeke kásip ashyp, nátijesin kórsetý keregin aitty, dep habarlaidy ult.kz.
Buǵan deiin áleýmettik jelide tanymal óner ieleriniń biznesine qatysty syn aitylǵan bolatyn. Jeli qoldanýshysynyń pikirinshe, keibir juldyzdar kásip júrgizýde ózderiniń tanymaldyǵyna arqa súiep, qyzmet kórsetý sapasy men tazalyq máselesine jetkilikti kóńil bólmeidi.
Synǵa ilikkenderdiń qatarynda prodiýser Gúlzira Aidarbekova, ánshi Jazira Baiyrbekova jáne aktrisa ári telejúrgizýshi Asha Matai bar.
Atalǵan pikir Gúlzira Aidarbekovanyń nazarynan tys qalmady. Prodiýser áleýmettik jelidegi paraqshasynda jaýap jariialap, syn aitqan mamannyń áreketin kópshilik nazaryn aýdarýǵa baǵyttalǵan qadam dep baǵalady.
"Boiaýshy, boiaýshy degenge saqalyn boiapty degendei, aqylshy bolyp eldi tańǵaldyryp, ataǵy bar adamdardyń artynan sóilep, haip jinap, podpischik kóbeitpei-aq qoishy. Bizdiń dúkenniń tazalyǵyndai dúken ashyp, jasap kór aldymen", – dep jazdy ol.
Aita keteiik, Nazgúl Sátbaeva qazaqstandyq juldyzdardyń biznesin synǵa aldy.
Gúlzira Aidarbekova kim?
Gúlzira Aidarbekova – qazaqstandyq tanymal prodiýser, kásipker ári ánshi Qairat Nurtastyń anasy. Ol 1968 jyly 12 sáýirde Túrkistan óńirinde dúniege kelgen. Balalyq shaǵy Shornaq aýylynda ótken. Otbasyndaǵy segiz balanyń jetinshisi bolyp ósken.
Gúlzira Aidarbekova jastaiynan eńbekke aralasyp, otbasyna kómektesý úshin gazet taratqan. Keiin Almaty qalasynda jumys istep, saýda salasynda tájiribe jinaǵan. Jubaiy – Nurtas Aidarbekov. Erli-zaiyptylar Qairat, Aian jáne Zańǵar esimdi úsh ul tárbielep ósirgen.
Ol kópshilikke Qairat Nurtastyń prodiýseri retinde tanyldy. 2008 jyly ulymen birge Kairat Nurtas Production prodiýserlik ortalyǵyn qurǵan. Ánshiniń kontsertterin uiymdastyryp, sahnalyq imidjin qalyptastyrýǵa jáne shyǵarmashylyǵyn nasihattaýǵa atsalysqan.
Sonymen qatar Gúlzira Aidarbekova kino salasynda da eńbek etip, «Arman» filminiń prodiýserleriniń biri boldy. Kásipkerlikpen de ainalysyp, kiim saýdasy baǵytynda jumys isteidi. 2025 jyly Qairat Nurtastyń prodiýserlik qyzmetin ulynyń ózine tapsyrǵanyn málimdedi.
