Jeńilip kórmegen qazaqstandyq kásipqoi boksshy Áli Ahmedov (14-0, 10KO) 8 maýsymda Niý-Iorkte ótetin Gennadii Golovkin (38-1-1, 34KO) - Stiv Rolls (19-0, 10KO) aiqasynyń anderkartynda ringke shyǵady.
Bul týraly Qazaqstan kásipqoi boks federatsiiasynyń VKontakte paraqshasynda jazyldy.
«Ahmedovtyń aiqasy BoxRec.com saitynyń profilinde tirkeldi. Qazaqstandyqtyń qarsylasynyń kim bolary áli belgisiz. Áli - GGG Promotions promoýterlik kompaniiasynyń klienti ekenin atap ótkim keledi», - delingen habarlamada.
Sonymen birge, Golovkin-Rolls aiqasynyń anderkartynda orta salmaqtaǵy amerikalyq Braian Sebalo (8-0, 4KO) pen jeńil salmaqtaǵy Mario Ramos (8-0, 7KO) óner kórsetedi. Olardyń da qarsylastary aldaǵy ýaqytta belgili bolady.
Qazaqstandyq boksshy 8 maýsymda Niý-Iorktegi (AQSh) Madison Square Garden arenasynda 35 jastaǵy kanadalyq boksshy Stiv Rollspen (19-0, 10 KO) kezdesetinin buǵan deiin jazǵan edik.
Stiv Rolls kásibi boksqa 2011 jyly aýysyp, ekinshi orta salmaqta (76,2 keli) óner kórsete bastady. Jekpe-jekterdiń basym bóligin óz elinde ótkizgen. Alty ret AQSh-ta judyryqtasty. S.Rolls osy ýaqytqa deiin birde-bir ret jeńilmegen. 19 jekpe-jekti 10 ret nokaýtpen aiaqtaǵan.
