Resei túrmesinde 31 naýryzdan beri ashtyq ustap jatqan oppozitsiialyq saiasatker Aleksei Navalnyi túrmeden aýrýhanaǵa aýystyrylady. Bul týraly Resei federaldyq qylmysty oryndaý qyzmetiniń (FSIN) Vladimir oblysy boiynsha basqarmasy habarlady.
Oppozitsioner aýystyrylady delingen aýrýhana Vladimir oblysyndaǵy IK-3 koloniiasynda ornalasqan. FSIN Navalnyidyń densaýlyǵyn ortasha dep baǵalaidy. Habarlamada oppozitsionerge óziniń kelisimimen vitamindik terapiia taǵaiyndalǵany jazylǵan.
Aqparat quraldary IK-3 túrmesinde azaptaý bar ekenin jazady. Túrmeniń burynǵy qyzmetkerleri ol jaqqa tutqyndardy "qaita tárbielep", qylmysty moiyndatý úshin aýystyratynyn aitqan. Sottalýshylar aýrýhanada ózderine psihtropty preparattar egip, azaptap, zorlaǵanyn málimdegen.
Osyǵan deiin Navalnyidy emdegen dárigerler onyń qan analiziniń qorytyndysyn jariialaǵan. Olar oppozitsionerdiń hali óte múshkil ekenin aitqan. Dáriger Anastasiia Vasileva Navalnyidyń júregi toqtap qalýy múmkin ekenin de eskertken.
- 2 aqpanda Máskeýdiń Simonov soty Aleksei Navalnyidy 2014 jyly "Iv Roshe isi" boiynsha shyqqan shartty jaza erejelerin oryndamady dep saiasatkerdi túrmege jibergen. Eýropanyń Adam quqyǵy jónindegi soty istiń saiasilanǵanyn aitqan. Oppozitsioner túrmede shamamen 2,5 jyl bolady.
- Naýryz aiynyń ortasynda Navalnyi beli men aiaǵynyń aýyratynyna shaǵymdanǵan. 31 naýryzda ózine qajetti dárejede meditsinalyq kómek kórsetilmei jatqanyn málimdep, ashtyq jariialaǵan. Kompiýter tomografiiasy onyń omyrtqa diskisinde "gryja" baryn kórsetken. Osyǵan deiin saiasatker "respiratorlyq aýrý belgilerimen" túrmeniń meditsinalyq bólimine jatqyzylǵan. Ol advokattaryna otriadtaǵy 15 adamnyń úsheýinen túbirkúlez anyqtalyp, aýrýhanaǵa túskenin habarlaǵan. Al túrme dárigerleri Navalnyidyń ózi de qatty jótelip, dene qyzýy joǵary bolǵanyn aitqan.
- Naýryz aiynyń sońynda myńnan astam dáriger bilikke ashyq hat jazyp, saiasatkerge táýelsiz dárigerdi kirgizýge shaqyrǵan.
- Jeksenbi kúni Navalnyi shtaby 21 sáýirde saiasatkerdiń bostandyǵyn talap etip, miting ótkizetinin habarlady.
