Astanada Astana Media Week 2026 mereitoilyq media aptalyǵy aiasynda «Tumar» jáne «Úrker» ulttyq syilyqtarynyń jeńimpazdaryn marapattaý rásimi ótti. Biyl qos syilyq alǵash ret Qazaqstan Media Awards ortaq ataýymen tabystaldy, dep habarlaidy ult.kz.
Saltanatty is-sharaǵa elimizdiń túkpir-túkpirinen otandyq media salasynyń ókilderi, jýrnalister, redaktorlar, telejúrgizýshiler men shyǵarmashylyq ujymdar qatysty.
Marapattaý rásiminde Qazaqstan Respýblikasynyń Mádeniet jáne aqparat ministri Arman Qyryqbaev sóz sóiledi. Ministr jańa tehnologiialar men jasandy intellekt qanshalyqty qarqyndy damysa da, kásibi jýrnalistika men óz isine adal mamandar qashanda suranysqa ie bolatynyn atap ótti.
«Memleket basshysy jýrnalistika salasyna árdaiym erekshe kóńil bólip, áleýmettik jáne moraldyq turǵydan únemi qoldaý kórsetip keledi. Bolashaqta da memlekettiń media salasyna qatysty saiasaty ózgermeidi dep oilaimyn», – dedi Arman Qyryqbaev.
Is-sharaǵa Qazaqstan Respýblikasy Quryltaiynyń depýtattary Sergei Ponomarev, Únzila Shapaq, Janarbek Áshimjan, Qazaqstan Halyq Keńesiniń múshesi Nurtóre Júsip, Q.AI bas direktory Dmitrii Mýn, Ulttyq kinony qoldaý memlekettik ortalyǵynyń basqarma tóraǵasy Qurmanbek Jumaǵali, Qazaqstan Respýblikasynyń Prezidenti janyndaǵy Ortalyq kommýnikatsiialar qyzmetiniń direktory Asqar Omarov, sondai-aq memlekettik organdar men media salasynyń ózge de ókilderi qatysty.
Biyl baiqaýdyń 12 nominatsiiasy boiynsha 600-den astam ótinim tústi. Syilyqqa televiziia, baspasóz, radio jáne internet jýrnalistikasy salasyndaǵy jumystar qabyldandy.
Osy jyly zamanaýi mediatehnologiialar men jýrnalistikanyń jańa formattaryn damytýǵa airyqsha nazar aýdaryldy. Alǵash ret «Jýrnalistikanyń bolashaǵy: jasandy intellekt salasyndaǵy úzdik joba» nominatsiiasy engizildi.
Jeńimpazdardy belgili jýrnalister, media salasynyń ókilderi men sala sarapshylarynan quralǵan táýelsiz qazylar alqasy anyqtady.
«Tumar» jáne «Úrker» ulttyq syilyqtary 2017 jyly Qazaqstan Respýblikasy Mádeniet jáne aqparat ministrliginiń bastamasymen taǵaiyndalǵan. «Tumar» syilyǵy otandyq televiziiany qoldaýǵa jáne damytýǵa baǵyttalsa, «Úrker» baspasóz, radio jáne internet jýrnalistikasyndaǵy jetistikter úshin beriledi.
2026 jylǵy «Tumar» jáne «Úrker» ulttyq syilyqtarynyń jeńimpazdary:
«Tumar – 2026» ulttyq televiziialyq syilyǵy
Úzdik telejúrgizýshi – Veronika Vishnevskaia, «Eýraziia» birinshi arnasy;
Úzdik derekti joba – 24KZ, «4739»;
Úzdik televiziialyq material – Qazaqstan, «Qarqyndy qurylys»;
Úzdik áleýmettik joba – Jibek Joly, «Pravda v detaliah»;
Úzdik telehikaia – Astana TV, «Aýyl bapkeri»;
Úzdik aqparattyq-taldamalyq baǵdarlama – 7-arna, «Novosti».
«Úrker – 2026» ulttyq syilyǵy
Jyldyń úzdik jýrnalisi – Janar Serdalina;
Úzdik radiojoba – Qazaq radiosy, «Oituma» baǵdarlamasy;
Jýrnalistikanyń bolashaǵy: jasandy intellekt salasyndaǵy úzdik joba – Altainews Media Centre, «AI-JAN»;
Úzdik mediajoba – Tengrinews, Tengri TV;
Jyldyń úzdik materialy – Miramgúl Rahatqyzy, «Aqtóbe» gazeti, «Jasandy intellekt: adamzat jańa dáýirge aiaq basty»;
Úzdik taldamalyq material – Laýra Týsýpbekova, «Kazahstanskaia pravda» gazeti, «Moia DNK – nashe bogatstvo».
Qazaqstan Media Awards – 2026 arnaiy júldeleri
Qazaqstan Respýblikasy Prezidentiniń teleradiokesheni – 30 jyl;
Informbiýro – 30 jyl.
