17 qazanda Qazaqstannyń soltústigi men shyǵysynda jańbyr men qar jaýyp, kóktaiǵaq bolady. Batysta jańbyr jaýyp, naizaǵai oinaidy. Kei óńirlerde tuman túsip, shańdy daýyl soǵady, dep habarlaidy ult.kz.
Astanada tańerteń jáne kúndiz jańbyr jaýady. Túnde −3…−1, kúndiz +10…+12 gradýs, jel 9–14 m/s bolady. Almatyda jaýyn-shashynsyz: túnde +1…+3, kúndiz +13…+15 gradýs, topyraq betinde úsik júredi. Shymkentte túnde +8…+10, kúndiz +22…+24 gradýs jyly bolady. Jaýyn-shashyn kútilmeidi, túnde jel ekpini 15–20 m/s-qa jetedi.
Aqmola, Qostanai, Soltústik Qazaqstan, Pavlodar, Abai jáne Shyǵys Qazaqstan oblystarynda jańbyr men qar jaýyp, tuman túsedi. Soltústik Qazaqstannyń ońtústiginde, Abai men Shyǵys Qazaqstan oblystarynyń kei aýdandarynda kóktaiǵaq kútiledi. Qaraǵandy oblysynda keshke azdaǵan jańbyr jaýady, Ulytaýda jaýyn-shashyn bolmaidy. Kúndiz soltústik pen shyǵysta negizinen +3…+12, Qostanai, Qaraǵandy jáne Ulytaý oblystarynda +10…+18 gradýs bolady. Qaraǵandy men Shyǵys Qazaqstannyń kei aýdandarynda túnde −9 gradýsqa deiin sýytady.
Batys Qazaqstan men Atyraý oblystarynda jańbyr, Mańǵystaýda shańdy daýyl kútiledi. Aqtóbede jaýyn-shashynsyz. Batysta kúndiz +17…+28 gradýs bolady. Almaty, Jetisý, Jambyl, Túrkistan jáne Qyzylorda oblystarynda jaýyn-shashyn kútilmeidi. Ońtústik pen ońtústik-shyǵystyń kei aýdandarynda úsik júrip, taýda tuman túsedi. Kúndiz +12…+25 gradýs jyly bolady. Alakól mańy men Jambyl oblysynda jel ekpini 23–28 m/s-qa jetedi.
