رەسەي تٷرمەسٸندە 31 ناۋرىزدان بەرٸ اشتىق ۇستاپ جاتقان وپپوزيتسييالىق ساياساتكەر الەكسەي ناۆالنىي تٷرمەدەن اۋرۋحاناعا اۋىستىرىلادى. بۇل تۋرالى رەسەي فەدەرالدىق قىلمىستى ورىنداۋ قىزمەتٸنٸڭ (فسين) ۆلاديمير وبلىسى بويىنشا باسقارماسى حابارلادى.
وپپوزيتسيونەر اۋىستىرىلادى دەلٸنگەن اۋرۋحانا ۆلاديمير وبلىسىنداعى يك-3 كولونيياسىندا ورنالاسقان. فسين ناۆالنىيدىڭ دەنساۋلىعىن ورتاشا دەپ باعالايدى. حابارلامادا وپپوزيتسيونەرگە ٶزٸنٸڭ كەلٸسٸمٸمەن ۆيتاميندٸك تەراپييا تاعايىندالعانى جازىلعان.
اقپارات قۇرالدارى يك-3 تٷرمەسٸندە ازاپتاۋ بار ەكەنٸن جازادى. تٷرمەنٸڭ بۇرىنعى قىزمەتكەرلەرٸ ول جاققا تۇتقىنداردى "قايتا تەربيەلەپ", قىلمىستى مويىنداتۋ ٷشٸن اۋىستىراتىنىن ايتقان. سوتتالۋشىلار اۋرۋحانادا ٶزدەرٸنە پسيحتروپتى پرەپاراتتار ەگٸپ, ازاپتاپ, زورلاعانىن مەلٸمدەگەن.
وسىعان دەيٸن ناۆالنىيدى ەمدەگەن دەرٸگەرلەر ونىڭ قان اناليزٸنٸڭ قورىتىندىسىن جارييالاعان. ولار وپپوزيتسيونەردٸڭ حالٸ ٶتە مٷشكٸل ەكەنٸن ايتقان. دەرٸگەر اناستاسييا ۆاسيلەۆا ناۆالنىيدىڭ جٷرەگٸ توقتاپ قالۋى مٷمكٸن ەكەنٸن دە ەسكەرتكەن.
- 2 اقپاندا مەسكەۋدٸڭ سيمونوۆ سوتى الەكسەي ناۆالنىيدى 2014 جىلى "يۆ روشە ٸسٸ" بويىنشا شىققان شارتتى جازا ەرەجەلەرٸن ورىندامادى دەپ ساياساتكەردٸ تٷرمەگە جٸبەرگەن. ەۋروپانىڭ ادام قۇقىعى جٶنٸندەگٸ سوتى ٸستٸڭ ساياسيلانعانىن ايتقان. وپپوزيتسيونەر تٷرمەدە شامامەن 2,5 جىل بولادى.
- ناۋرىز ايىنىڭ ورتاسىندا ناۆالنىي بەلٸ مەن اياعىنىڭ اۋىراتىنىنا شاعىمدانعان. 31 ناۋرىزدا ٶزٸنە قاجەتتٸ دەرەجەدە مەديتسينالىق كٶمەك كٶرسەتٸلمەي جاتقانىن مەلٸمدەپ, اشتىق جارييالاعان. كومپيۋتەر توموگرافيياسى ونىڭ ومىرتقا ديسكٸسٸندە "گرىجا" بارىن كٶرسەتكەن. وسىعان دەيٸن ساياساتكەر "رەسپيراتورلىق اۋرۋ بەلگٸلەرٸمەن" تٷرمەنٸڭ مەديتسينالىق بٶلٸمٸنە جاتقىزىلعان. ول ادۆوكاتتارىنا وتريادتاعى 15 ادامنىڭ ٷشەۋٸنەن تٷبٸركٷلەز انىقتالىپ, اۋرۋحاناعا تٷسكەنٸن حابارلاعان. ال تٷرمە دەرٸگەرلەرٸ ناۆالنىيدىڭ ٶزٸ دە قاتتى جٶتەلٸپ, دەنە قىزۋى جوعارى بولعانىن ايتقان.
- ناۋرىز ايىنىڭ سوڭىندا مىڭنان استام دەرٸگەر بيلٸككە اشىق حات جازىپ, ساياساتكەرگە تەۋەلسٸز دەرٸگەردٸ كٸرگٸزۋگە شاقىرعان.
- جەكسەنبٸ كٷنٸ ناۆالنىي شتابى 21 سەۋٸردە ساياساتكەردٸڭ بوستاندىعىن تالاپ ەتٸپ, ميتينگ ٶتكٸزەتٸنٸن حابارلادى.
