Qazaqstandyq kásipqoi boksshy Firýza Sháripova Mádeniet jáne sport ministrliginiń chempiondyq jekpe-jekke qarajat bólý týraly málimdemesine qatysty pikir bildirdi, dep habarlaidy QazAqparat tilshisi.
«Biz Mádeniet jáne sport ministrligine jáne ministr Arystanbek Muhamediulyna zor alǵysymyzdy bildiremiz. 2018 jyldyń mamyr aiynda bizge kórsetilgen qarjylyq kómektiń arqasynda ótken jyldyń 9 qyrkúieginde Sankt-Peterbýrgte aiqas ótkizip, jeńil salmaqtaǵy WIBA nusqasy boiynsha álem chempiony titýlyn saqtap qaldym», - dep jazady sportshy Instagram paraqshasynda.
Boksshy óziniń chempiondyq belbeýin saqtap qalý úshin qansha qarajat kerek ekenin de jasyrmady.
«Osydan keiin-aq maǵan birden IBO nusqasy boiynsha álem chempiony jáne WBC Silver belbeýi úshin aiqas ótkizý kerek edi. Osy jáne ekinshi jartylai salmaqta tolyqqandy WBC álem chempiony jańa titýlyn jeńip alý úshin biz Eva Valstremmen kelisimge kelgen edik. Alaida 500 myń dollar kóleminde qarajat taba almadyq», - deidi boksshy.
Onyń aitýyna qaraǵanda, tartyp alynǵan belbeýler úshin atalǵan qarajat áli de qajet.
«Men eki salmaq boiynsha álem chempiony edim. Endi qazir bir salmaqtaǵy osyndai mártebemnen aiyrylyp qaldym. Tartyp alynǵan belbeý pen jańa titýldy jeńip alý úshin 500 myń dollar kerek. Keibir BAQ-ta aqparat durys jariialanbai jatyr. Biz eshkimdi kinálap turǵan joqpyz. Jai ǵana aiqasymdy ótkizý úshin qarjylyq kómek suraimyz. Bul - eń mártebeli titýl jáne álemdegi eń úzdik qarsylaspen bolatyn jekpe-jek», - deidi sportshy.
Eske sala ketsek, Firýza Sháripova IBO tujyrymy boiynsha álem chempiony titýlynan jáne WBC Silver belbeýinen aiyrylǵany osyǵan deiin habarlanǵan bolatyn. Oǵan qatysty sportshy:
«Bul - qalypty jaǵdai, sebebi bir jyldan beri qorǵalǵan joq. Chempion óz belbeýin qorǵaýy tiis. Ótken jyldyń sońynda Eva Valstremmen birlesken aiqas ótkizýdi josparladyq. Ol - WBC tujyrymy boiynsha chempiondyq titýldyń iegeri. Qarjylandyrýǵa kómek suradyq. Ákimdikter men Mádeniet jáne sport ministrine hat joldadyq. Ókinishke qarai, bizge qarajat tabylmady», - degen edi.
Sportshynyń osy sózinen keiin QR Mádeniet jáne sport ministrligi kásipqoi boksshy Firýza Sháripovanyń málimdemesine resmi túrde jaýap berdi.
