26 qarasha kúni túnde Erjan Maksim Almatyǵa ushyp keledi, dep habarlaidy "Ult aqparat".
«Dostar! Búgin túngi 02:45-te Almaty áýejaiyna Erjan Maksimmen birge qazaqstandyq delegatsiia ushyp keledi. Jeńimpazymyzdy qushaq jaia kútip alaiyq. Barlyǵyńyzdy áýejaida kútemiz», - dep jazdy ánshiniń fan-klýbynyń Instagram paraqshasynda.
Mádeniet jáne sport ministrligi jas ánshiniń dál sol ýaqytta ushyp keletinin rastap otyr.
Buǵan deiin QR Prezidenti Qasym-Jomart Toqaevtyń Erjan Maksimdi án baiqaýyndaǵy júldesimen quttyqtaǵany habarlanǵan bolatyn. Kók týdy jelbiretken jas ánshini Dimash Qudaibergen de quttyqtap, Instagram paraqshasynda «Qulynshaq, jeńisiń qutty bolsyn! Ekinshi oryn emes, men úshin birinshi oryn dep bilemin!!! Jaraisyń balapan!!!» dep jazdy.
Óz kezeginde Erjan Maksim qazaqstandyqtarǵa alǵysyn aitty.
«Qurmetti dostarym, apa-aǵalarym, ata-ájelerim. Maǵan daýys bergenderińiz úshin kóp-kóp rahmet! Osy jeńiske sizderdiń arqalaryńyzda jetip otyrmyn», - dep jazdy ánshi.
Eske sala ketsek, Polshada ótken «Junior Eurovision-2019» án baiqaýynda baq synaǵan qazaqstandyq Erjan Maksim ekinshi oryn alǵan bolatyn. Qazylardyń bergen baǵasy boiynsha Erjan Maksim birinshi oryn aldy. Al onlain daýys berý qorytyndysymen 79 upai jinady. Osylaisha qazaqstandyq ánshi jalpy 227 upaimen ekinshi oryn boldy. Baiqaýdyń bas júldesin 278 upai jinaǵan Polsha ókili Viki Gabor jeńip aldy.
