Foto: "Belsendi uzaq ómir súrý ortalyǵynyń" baspasóz qyzmetinen
Jihankez jýrnalist Dinara Bolattyń ózge paiymy Ult.kz-te.
Burynǵy zamanda qazaq eresekteri qartaiýǵa asyqqan syńaily. Qarttyq bastalsa «bala shaǵany asyraý beinetinen qutylyp, qý basymyz syily bolyp, tezirek qazynaly ata-áje sanatyna ótip, bala-kelinniń qamqorynda bolamyz, janymyz tynyshtyq tabady» dep túsinetinder kóp bolǵan. Keiin qoǵam, túsinik ózgere bastady. Jastar burynǵydai balalaryn ata-áje qolyna qaldyrmai, biri úlken qalaǵa oqýǵa, keibiri shetelge ketemiz dei bastady. Jastardyń óz joly, jeter muraty bar ekeni aitylatyn boldy. Túsinýge bolady. Ata-ananyń maqsaty qai balanyń da amandyǵyn tilep, tilekshi bolyp qalý.
Tek bir másele, burynǵy qariialar siiaqty emes, qazirgi egde jastaǵy kisilerdiń júzderinde turmys taýqymetiniń izi az, aqjaýlyqty áje, aqsaqal deýge kelmeitin áldi-qýatty jas zeinetkerler eki ortada ári qarai qalai ómir súrerin bilmei qaldy. Biri jalǵyz qalǵysy kelmei bala men kelinniń ortasyna tússe, biri jalǵyzdyqty, jumyssyz úide qalýdy qabyldai almai, ishtei ózin jep sharshady.
Zeinetke shyǵý, qarttyqqa aiaq basý ̶ ómirdiń sońy taiap qaldy degendi bildirmeidi. Mysaly zeinet jasyndaǵy eresekterdiń dál osy máselesin sheshý maqsatynda damyǵan shet elderde arnaiy ortalyqtar men úiirmeler, ońaltý oryndary áýelden kóptep ashylǵan.
Shúkir, kóshten keiin bolsa da bizdiń elimizde de egde jastaǵy zeinetkerlerge fizilogiialyq, psihologiialyq qoldaý kórsetetin «Belsendi uzaq ómir súrý ortalyǵy» ashyldy. Ári bul ortalyqtyń sońǵy jyldary elimiz boiynsha filialdary kóbeidi. Bir ókinishtisi, bul ortalyqtar týraly kóp adam habarsyz.
Foto: "Belsendi uzaq ómir súrý ortalyǵynyń" baspasóz qyzmetinen
Osy oraida Astana qalasy Ákimdiginiń «Belsendi uzaq ómir súrý ortalyǵy» Áleýmettik qyzmetterdi aqparattyq ilgeriletý bóliminiń basshysy Merýert Nurǵalievadan ortalyq múmkindikteri týraly aityp berýin suradyq.
«Qazirgi tańda Astana qalasy boiynsha alty «Belsendi uzaq ómir súrý ortalyǵy» bar. Negizgi jumysymyz ̶ qala zeinetkerlerin áleýmettik saýyqtyrý. Áleýmettik-meditsinalyq, áleýmettik-ekonomikalyq, áleýmettik-eńbek, bos ýaqyttaryn ótkizý baǵyttarynda úiirme, sektsiia, klýb aiasynda zeinetkerlerge túrli tegin qyzmet kórsetemiz. Aǵymdaǵy jyldyń basynan bizge bir myńnan astam zeinetker kelip tirkeldi. Al jalpy kúni búginge deiin Astana qalasy boiynsha 15 000-nan asa zeinetker túrli belsendilikke qatysyp júr. Jalpy kúnine 2500 zeinetker túrli tegin qyzmet túrin alady. Zeinetkerler bizdiń klýbtarǵa kelip, ústel tennisi, volonterlar klýby, egde jastaǵy kiim úlgisi, kýng-fý, vokal, dombyra men gitaradan sabaq alady. Úiirmelerge toqtalar bolsaq, ońaltý gimnastikasy, egde jastaǵy adamdarǵa arnalǵan fitnes, ioga, aikýne, emdik tuzdy shahta, aǵylshyn tili, shahmat, eńbek terapiiasy, qolóner, keskindemege qatysady. Sonymen qatar, bizdiń ortalyqta úlkenderimizge arnalǵan fiziologiialyq relaksatsiia kabinetteri, psihologiialyq keńes jáne toptyq treningter bar», ̶ deidi Merýert Nurǵalieva.
Bólim basshysy bul qyzmetterdiń barlyǵy tegin kórsetiletinin aityp otyr. «Belsendi uzaq ómir súrý ortalyǵyna» keletin zeinetkerlerdiń basym kópshiligi densaýlyqtaryn saýyqtyrý úshin keledi eken.
«Belgili ýaqyt boiy bizde ótkiziletin sharalarǵa turaqty qatysyp kelgen zeinetkerler densaýlyqtarynda, psihologiialyq jai-kúiinde oń ózgerister baiqap, alǵystaryn aityp jatady. Ómir boiy ózin qyzmetke arnap, armandaryn keiinge ysyryp qoiǵan qariialar kóp. Mundai jandar bizdegi túrli úiirmeler arqyly óz qabiletterin shyńdap, armandaryn oryndap jatady. Bizdiń ortalyqqa kelip bir birimen tanysyp, dos-qurby taýyp, tipti otbasy quryp ketip jatqandar bar. Jalpy ortalyǵymyzdyń maqsaty ̶ zeinet jasyndaǵylardyń ómir súrý deńgeiiniń sapasyn jaqsartyp, ómir súrýge qulshynystaryn arttyrý. Nátije bar. Osy maqsatta áli de jumys isteimiz», ̶ deidi «Belsendi uzaq ómir súrý ortalyǵy» Áleýmettik qyzmetterdi aqparattyq ilgeriletý bóliminiń basshysy.
«Belsendi uzaq ómir súrý ortalyqtary» búginde elimizdiń kóp qalasynda bar. Bul ortalyqqa tirkelý úshin bar bolǵany zeinetkerlik kýáligi, jeke basynyń kýáligi men turǵylyqty mekenjai boiynsha tirkeý anyqtamasy qajet.
Foto: "Belsendi uzaq ómir súrý ortalyǵynyń" baspasóz qyzmetinen
PAIYM
Jyldan jylǵa qarttyq keshigip, jastyq uzaryp jatyr. Zeinetkerlerimizdiń kóbi áli qýatty. Tek tórt qabyrǵa ortasynda jalǵyz qalyp, ózin eshkimge qajetsiz sezinip, kóńilderi kúpti bolmas úshin eń áýeli ózderiniń tarapynan áli de belsendi, ádemi ómir súrsem degen niet kerek. Ol nietin iske asyrýda kómekke keler ortalyqtar daiyn. Ár zeinetker óz ortasyn, súiikti isin taýyp, armandaryn oryndap, ekinshi jastyǵyn ádemi ótkizse quba qup.
Dinara Bolat
.jpg)
