Sheteldik týristerdiń qyzyǵýshylyǵyn saqtap qala alamyz ba?

 

Baiqaǵanym sońǵy jyldary Qazaqstanǵa shetelden týrister kóptep kele bastady. Ózim oqityn trevel blogerlerdi bizdiń jerde júrgenin kórgende tań qalyp, qýanyp, "qandai áser alyp jatyr eken" dep ýaiymdap qalamyn.

 

Shetelden keletin týrister aǵynyn kóbeie bastaýyna birden bir sebep – vizalyq rejimniń kóp el úshin ashyqtyǵy. Odan soń koronavirýstan keiin, jyldan jylǵa halyqaralyq baǵyttaǵy túrli aviareister sany kóbeidi.

 

Qazaq jeriniń tumsa tabiǵatynyń erekshe ádemiligin áýelden estip, kórgisi kep júrgen Qytai, Ońtústik Koreia, Malaiziia, Túrkiia, Eýropa elderiniń azamattary úshin qaqpa ashyldy. Áleýmettik jelide qaldyrǵan sýret, video kontentteri arqyly kóp jaǵdaida sheteldik týrister Sharyn shatqaly, Kólsai kólderi men Mańǵystaý jyralaryna saiahattap, etno kafe, meiramhanalarda eldiń dámin tatyp gastrotýrizmdi de eleýsiz qaldyrmaǵanyn baiqaýǵa bolady. 

 

Elimizge týristerdiń kóptep kelýi bir jaǵynan qýantyp, bir jaǵynan ýaiymdatady.

 

 

Ishki týrizmde jurt aitpasa da ózimizge belgili sheshilmegen máseleler bar. Jol jaǵdaiy kei aimaqtarda óte qiyn. Kei nysandarǵa jetý alys, ári kúrdeli. Jol boiyndaǵy dárethanalardyń bolý-bolmaýy jáne tazalyǵy qatty alańdatady. Etno as máziri bar tamaqtaný oryndary stildi, ádemi kelgenmen, aǵylshyn tilinde qyzmet kórsetetin adam sany úlken qalalarda bolmasa, óńirlerde azdaý. Ári bylaisha kezde joldarynda "kelgen qonaqtardyń qaltasyn paidalanyp qalsaq" degen taksist kezdespese eken degen úmit bar.

 

 

Árine shetelge shyqqan ár saiahatshy barǵan eldiń óz ereksheligi, óz yrǵaǵy, ózine tán qiyndyqtary bolatynyn túsinip kelýi kerek. Saiahatshy bolǵandyqtan onyń bárine moraldik turǵyda daiyn bolýy shart. Alda turǵan belgisizdik, jol, jón surasý, kei qiyndyqtarǵa tap bolý saiahattyń eń qyzyq bóligi desek te bolady.

 

Degenmen jergilikti halyq kelgen qonaqqa izettilik kórsetip, al bilik týrizm salasynda bar máselelerdi sheshýge tyrysýy kerek. Basqa elge bergisiz ózimizdiń ulttyq bolmysymyzdy, ǵajap tabiǵatymyzdy saqtai otyryp, ony ádemi usyna alsaq bul – turaqty damýdyń negizi bolmaq. Ketken qonaq barǵan jerinde Qazaq eli týraly tamsana aityp júretindei, onyń áńgimesinen áserlengen sheteldikter artynsha bizge keletindei jaǵdai jasaýymyz kóregen saiasat bolar edi.