Para alý jáne alaiaqtyq jasaǵany úshin 6 jylǵa bas bostandyǵynan aiyrylǵan Óskemenniń burynǵy ákimi, ShQO ákiminiń eks-birinshi orynbasary Jaqsylyq Omardyń isi apelliatsiialyq sotta qaraldy, dep habarlaidy ult.kz.
20 mamyr kúni ShQO sotynyń qylmystyq ister jónindegi sot alqasy onyń apelliatsiialyq shaǵymyn qarady.
Buǵan deiin Óskemen qalasynyń qylmystyq ister jónindegi aýdanaralyq soty Jaqsylyq Omardy QR QK 190-baby 3-bóligi 1 jáne 2-tarmaqtary, 366-baby 3-bóligi 3-tarmaǵy boiynsha (alaiaqtyq jáne para alý) kináli dep tanyp, 6 jylǵa bas bostandyǵynan aiyrý týraly úkim shyǵarǵan edi. Sondai-aq onyń múlki tárkilenip, memlekettik qyzmette laýazym atqarý quqyǵynan ómir boiyna aiyrylǵan.
Apelliatsiialyq shaǵymdy jábirlenýshi tarap pen qorǵaýshylar bergen. Olar jaza tym qatań dep eseptep, úkimdi ózgertýge ótinish bildirgen.
Alaida sot alqasy birinshi satydaǵy sot sheshimin zańdy ári negizdi dep taýyp, aiyptalýshynyń áreketteri durys saralanǵanyn málimdedi. Sonymen qatar sot sybailas jemqorlyq sipatyndaǵy qylmystyń qoǵamǵa tigizetin aýyr zardabyn, memlekettik bilikke degen senimge nuqsan keltiretinin eskergen.
Nátijesinde apelliatsiialyq sot úkimdi ózgerissiz qaldyrdy.
Eske salaiyq, buǵan deiin Jaqsylyq Omar 6 jylǵa sottalyp, onyń Toyota Camry kóligi tárkilengeni jáne ómir boiyna memlekettik qyzmetten shettetilgeni habarlanǵan bolatyn. Sondai-aq qoldanystaǵy zańnamaǵa sáikes, sybailas jemqorlyq qylmystary úshin raqymshylyq pen merziminen buryn bosatý normalary qoldanylmaityny aitylǵan
