Memleket basshysy Qasym-Jomart Toqaev Ermek Saǵymbaevty basqa jumysqa aýysýyna bailanysty Ulttyq qaýipsizdik komitetiniń tóraǵasy qyzmetinen bosatty. Bul sheshim arnaiy qyzmetti reformalaý aiasynda basshylyq quramdy jańartý qajettiligimen bailanysty, dep habarlaidy ult.kz.
Bul týraly Prezidenttiń baspasóz hatshysy Aibek Smadiiarov málimdedi.
Onyń aitýynsha, Memleket basshysy Ermek Saǵymbaevty qyzmetten bosatý týraly sheshim qabyldaǵanda jemqorlyqqa qatysy bar laýazymdy tulǵalardy ustaý kezinde kúshtik qurylym qyzmetkerleri jibergen qatelikterdi de eskergen. Osyǵan bailanysty Ishki ister ministri Erjan Sádenovke qyzmettik eskertý jariialandy.
Aibek Smadiiarovtyń málimetinshe, «Samuryq-Qazyna» qory men «Qazaqstan temir joly» kompaniiasy basshylaryna qatysty isterdegi jemqorlyq sipatyna kúmán joq. Tergeý amaldary kezinde figýranttardyń áreketteri de muny rastaǵan.
Sondai-aq Prezident júrgizilip jatqan tergeý sharalarynan áýel bastan habardar bolǵan. Onyń jemqorlyqqa qarsy kúreske qatysty ustanymy ózgermegeni aityldy.
Budan bólek, búgin Qasym-Jomart Toqaev Ishki ister ministrliginiń basshylyq quramymen jiyn ótkizdi. Kezdesýde politsiiadaǵy qyzmettik tártipti nyǵaitý, qoǵamdyq qaýipsizdikti qamtamasyz etý jáne qyzmetkerlerdiń kásibi daiarlyǵyn arttyrý mindetteri qoiyldy.
Memleket basshysy Erjan Sádenovke politsiianyń qatardaǵy qyzmetkerleri men ofitserler quramyndaǵy tárbie jumysyn kúsheitýdi tapsyrdy.
Aita keteiik, buǵan deiin Qasym-Jomart Toqaev UQK-niń jańa tóraǵasy Marat Irmenovke birqatar tapsyrma berdi.