Elimizde dárethanasy aýlada ornalasqan 245 mektep qalyp otyr. Bul týraly QR Bilim jáne ǵylym ministrligi Bilim jáne ǵylym salasyndaǵy baqylaý komitetiniń basshysy Gúlzat Kóbenova aitty, dep habarlaidy QazAqparat.
«Búginde monitoringpen 6 971 mektep qamtyldy. Tek 245 mektep ǵana aýladaǵa dárethana qalyp otyr. Is júzinde bir jyl buryn bul san 2 700-den astamdy mektepti quraǵan bolatyn. Osy arqyly óńirlerdegi jyly týalet ornatý dinamikasyn baiqaimyz. Dárethana aýlada ornalasqan 245 mektepte jynysyna bailanysty bólý, aralyq qabyrǵa ornatý syndy problemalar bar. Degenmen, bul mektepter sheshim taýyp jatyr. Olardyń ishinde 195 bilim berý uiymy jyly dárethana ornatý jumystaryn júrgizý ústinde. Qalǵan 50 mektepke qatysty másele sheshilýde. Bul bilim ordalary Atyraý, Almaty, Shyǵys Qazaqstan, Jambyl, Batys Qazaqstan, Qaraǵandy, Túrkistan oblystarynda jáne Shymkent qalasynda ornalasqan», - dedi Gúlzat Kóbenova ministrliktiń apparat keńesi barysynda.
Onyń atap ótýinshe, dárethanalardy jynysqa bailanysty bólý, aralyq qabyrǵa jasaý máselelerine de monitoring júrgizilgen. 33 mektep dál osyndai sáikessizdikti joiýy tiis. 195 mektepte atalǵan problemany joiýǵa baǵyttalǵan jumys aiaqtalýǵa jaqyn. Olardyń barlyǵynda jyl sońyna deiin kemshilikterdi joiý jumystary atqarylady.
«Memleket basshysynyń tapsyrmasyna sáikes, ótken jyldyń qarashasynan búginge deiin 2 700 mekteptiń ishinde 2 456 bilim berý uiymyna jyly dárethana ornatyldy. Jyly dárethanalar tolyqqandy jumys isteý úshin jynysyna qarai bólý, aralyq qabyrǵa qarastyrý, sý berý máselesin sheshý qajettigine nazar aýdartqym keledi. Áli kúnge deiin 197 uiymda sý berý problema oryn alyp otyr. Sonymen qatar káriz júiesine qosý máselesin de sheshken jón», - dedi ol.
