Burynǵy depýtat Samat Nurtaza Qazaqstan qoǵamyndaǵy áleýmettik jiktelý máselesin kóterdi, dep habarlaidy ult.kz.
Bul týraly sóz qozǵaýyna Baian Alagózovanyń bolashaq kúieý balasyna qoiatyn talaptary sebep bolǵan. Aita keteiik, prodiýser qyzy Aiarý aǵylshyn bilmeitin, klassikalyq mýzykadan habary joq jigitke turmysqa shyqpaitynyn málimdegen.
Eks-depýtat Facebook-tegi jazbasynda qoǵamda taptyq aiyrmashylyq buryn da bolǵanymen, qazir onyń «óte qatty, ashyq, qatal, anaiy formada» baiqalyp otyrǵanyn jazdy.
«Bireýdiń jeitin nany joq bolsa – bireý Mstislav Rostropovichtiń áýenin tyńdap, golf oinaidy», – dedi Samat Nurtaza.
Onyń pikirinshe, qoǵamdaǵy taptyq jiktelý kúsheie berse, ártúrli áleýmettik toptardyń arasynda bailanys úzilýi múmkin.
Samat Nurtaza ásirese aýqatty otbasylardyń balalarynyń óz ortasynan jar tańdaýǵa umtylatynyna nazar aýdardy.
«Kóptegen sheneýnikterdiń, bailardyń, iri kásipkerlerdiń ul-qyzdary ózderimen terezesi teń adamdarmen otbasy qurdy. Bundai jappai kezdeisoqtyq bolmaidy», – dep jazdy ol.
Onyń sózinshe, bai otbasylar úshin bolashaq qudalardyń materialdyq jaǵdaiy mańyzdy bolyp, adamnyń ishki dúniesi, imandylyǵy men inabattylyǵy ekinshi orynǵa yǵysýy múmkin.
Nurtaza bul tendentsiia bolashaqta da jalǵasyp, adamdardyń óz áleýmettik tobynyń ókilderimen ǵana otbasy qurýy jiilei túsedi dep sanaidy.
«Million dollary bar adam million teńgesi joq adammen sóileskisi kelmeidi, onymen bailanysyp otyrǵysy kelmeidi, tem bolee ondai adammen quda bolǵysy kelmeidi», – dedi ol.
Samat Nurtaza bul máseleni tek Baian Alagózovanyń jeke pikiri retinde emes, qoǵamdaǵy aýqatty toptyń dúnietanymymen bailanysty qubylys retinde qarastyrý qajet dep esepteidi.
