Dimash Qudaibergen - tek ánshi ǵana emes, qazaq mádenietin álemge tanytqan erekshe óner iesi. Ol shyǵarmashylyǵynda klassikalyq vokal, zamanaýi estrada jáne qazaqtyń dástúrli mýzykalyq murasyn úilestire bildi. Alty oktavany qamtityn sirek daýys diapazonynyń arqasynda tómengi registrden soprano men asa joǵary ysqyryq registrine deiin erkin oryndai alady. Osy ereksheligi ony búgingi zamannyń eń kásibi vokalisteriniń qataryna qosty, der habarlaidy Ult.kz.
Ónerge bastaǵan otbasy
Dinmuhammed Qanatuly Qudaibergen 1994 jylǵy 24 mamyrda Aqtóbe qalasynda ónerli otbasynda dúniege kelgen. Qazaqy dástúrge sai onyń tárbiesine negizinen ájesi Miýa Nizamýtdinova men atasy Qudaibergen Aitbaev erekshe kóńil bóldi. Bolashaq ánshi atasynyń esimin ielengen.
Atasy Dimashqa dombyra tartýdy úiretse, ájesi aiaǵy aýyrsa da kún saiyn nemeresin mýzyka mektebine ózi aparyp, alyp qaitqan. Ustazdary onyń absoliýtti estý qabiletin bes jasynda-aq baiqap, sol kezden bastap kásibi mýzykalyq bilim alýǵa jol ashyldy.
Álemdik sahnaǵa bastaǵan jol
Dimashtyń shyǵarmashylyq joly halyqaralyq baiqaýlardaǵy jeńisterden bastaldy. Ol Qazaqstandaǵy «Jas qanat», Qyrǵyzstandaǵy «Meikin Aziia» sekildi bedeldi dodada top jaryp, ónerimen kópshiliktiń yqylasyna bólendi.
Alaida onyń álemdik deńgeidegi úlken serpilisi 2017 jyly Qytaidaǵy Singer jobasynan keiin boldy. Baiqaýda ekinshi oryn alǵan Dimash az ýaqyttyń ishinde milliondaǵan kórermenniń súiikti ánshisine ainaldy. Qytailyq jankúierler ony mádenietterdi jaqyndastyrǵan óner iesi dep baǵalady. Ol qazaq, qytai, frantsýz, italian jáne basqa da kóptegen tilde erkin án oryndaidy.
Ustanymynan ainymaityn óner iesi
Dimash tek erekshe daýysymen emes, ómirlik ustanymymen de kóptiń qurmetine ie.
2019 jyly ol AQSh-tyń CBS telearnasyndaǵy The World's Best shoýynan óz erkimen ketti. Sebebi joba aiasynda balalarmen óner saiysyna túsýi kerek bolǵan. Dimash qazaq halqynyń dástúrinde úlkenniń kishimen básekege túsýi emes, kerisinshe qoldaý kórsetýi mańyzdy ekenin aityp, baiqaýdan bas tartty.
Bul sheshim qazylar arasynda túrli pikir týdyrǵanymen, álemniń túkpir-túkpirindegi jankúierleri onyń bul qadamyn joǵary baǵalady.
Shyǵarmashylyq erkindik - basty qaǵidasy
Kóptegen álemdik juldyzdardan ózgeshe, Dimash prodiýserlik ortalyqtarmen nemese iri mýzykalyq leibldermen jumys istemeidi. Ol shyǵarmashylyq erkindigin saqtaýdy jón kóredi.
Ánshiniń barlyq jobasyn ákesi jetekshilik etetin DimashAli Creative Center júzege asyrady. Kompozitsiia mamandyǵy boiynsha magistr dárejesin alǵan Dimash óz ánderiniń mýzykasyn ózi jazyp, aýqymdy jobalardy da ózi ázirleidi. Sonyń biri - soǵysqa qarsy ideiany kóteretin The Story of One Sky mýzykalyq filmi.
2026 jyly Makaoda ótken Weibo Gala marapatynda ol alǵash ret prodiýser retinde halyqaralyq syilyqqa ie boldy.
«Dears» - álemdi biriktirgen jankúierler qaýymdastyǵy
Dimashtyń jankúierleri ózderin Dears dep ataidy. Bul - álemniń kóptegen elinen quralǵan úlken qaýymdastyq.
Olar qaiyrymdylyq sharalaryn ótkizip, aǵash otyrǵyzady, túrli áleýmettik bastamalardy qoldaidy. Tipti Dimashtyń qurmetine gúlderdiń jańa suryptaryna onyń esimi berilgen jaǵdailar da kezdesedi.
Óner iesiniń ózi BUU-nyń Halyqaralyq kóshi-qon uiymynyń (IOM) izgi niet elshisi retinde beibitshilik pen birlikti nasihattap keledi. Onyń Niý-Iorktegi Barclays Center men Madison Square Garden sekildi áigili sahnalardaǵy kontsertteri de osy qundylyqtardy dáripteýge baǵyttalǵan.
Tabysqa jetkizgen qupiia
Mýzyka mamandary Dimashtyń daýysyn áli kúnge deiin erekshe qubylys retinde baǵalaidy. Biri onyń vokaldyq tehnikasyn zerttese, endi biri ony «qaitalanbas daýys iesi» dep ataidy.
Al Dimashtyń ózi úshin mýzyka - eń aldymen sezim men týǵan eline qyzmet etýdiń joly. Áke-sheshesiniń aitýynsha, onyń búgingi jetistiginiń negizinde uzaq jylǵy eńbek, qatań tártip, ziiandy ádetterden alys bolý jáne ónerge degen sheksiz mahabbat jatyr.
Dimash Qudaibergen óz talantynyń, ulttyq bolmysyna degen adaldyǵynyń jáne shyǵarmashylyq erkindiginiń arqasynda kózi tirisinde-aq álem moiyndaǵan tulǵaǵa ainaldy.
