ديماش قۇدايبەرگەن - تەك ەنشٸ عانا ەمەس, قازاق مەدەنيەتٸن ەلەمگە تانىتقان ەرەكشە ٶنەر يەسٸ. ول شىعارماشىلىعىندا كلاسسيكالىق ۆوكال, زاماناۋي ەسترادا جەنە قازاقتىڭ دەستٷرلٸ مۋزىكالىق مۇراسىن ٷيلەستٸرە بٸلدٸ. التى وكتاۆانى قامتيتىن سيرەك داۋىس دياپازونىنىڭ ارقاسىندا تٶمەنگٸ رەگيستردەن سوپرانو مەن اسا جوعارى ىسقىرىق رەگيسترٸنە دەيٸن ەركٸن ورىنداي الادى. وسى ەرەكشەلٸگٸ ونى بٷگٸنگٸ زاماننىڭ ەڭ كەسٸبي ۆوكاليستەرٸنٸڭ قاتارىنا قوستى, دەر حابارلايدى Ult.kz.
ٶنەرگە باستاعان وتباسى
دٸنمۇحاممەد قاناتۇلى قۇدايبەرگەن 1994 جىلعى 24 مامىردا اقتٶبە قالاسىندا ٶنەرلٸ وتباسىندا دٷنيەگە كەلگەن. قازاقى دەستٷرگە ساي ونىڭ تەربيەسٸنە نەگٸزٸنەن ەجەسٸ ميۋا نيزامۋتدينوۆا مەن اتاسى قۇدايبەرگەن ايتباەۆ ەرەكشە كٶڭٸل بٶلدٸ. بولاشاق ەنشٸ اتاسىنىڭ ەسٸمٸن يەلەنگەن.
اتاسى ديماشقا دومبىرا تارتۋدى ٷيرەتسە, ەجەسٸ اياعى اۋىرسا دا كٷن سايىن نەمەرەسٸن مۋزىكا مەكتەبٸنە ٶزٸ اپارىپ, الىپ قايتقان. ۇستازدارى ونىڭ ابسوليۋتتٸ ەستۋ قابٸلەتٸن بەس جاسىندا-اق بايقاپ, سول كەزدەن باستاپ كەسٸبي مۋزىكالىق بٸلٸم الۋعا جول اشىلدى.
ەلەمدٸك ساحناعا باستاعان جول
ديماشتىڭ شىعارماشىلىق جولى حالىقارالىق بايقاۋلارداعى جەڭٸستەردەن باستالدى. ول قازاقستانداعى «جاس قانات», قىرعىزستانداعى «مەيكين ازييا» سەكٸلدٸ بەدەلدٸ دودادا توپ جارىپ, ٶنەرٸمەن كٶپشٸلٸكتٸڭ ىقىلاسىنا بٶلەندٸ.
الايدا ونىڭ ەلەمدٸك دەڭگەيدەگٸ ٷلكەن سەرپٸلٸسٸ 2017 جىلى قىتايداعى Singer جوباسىنان كەيٸن بولدى. بايقاۋدا ەكٸنشٸ ورىن العان ديماش از ۋاقىتتىڭ ٸشٸندە ميلليونداعان كٶرەرمەننٸڭ سٷيٸكتٸ ەنشٸسٸنە اينالدى. قىتايلىق جانكٷيەرلەر ونى مەدەنيەتتەردٸ جاقىنداستىرعان ٶنەر يەسٸ دەپ باعالادى. ول قازاق, قىتاي, فرانتسۋز, يتاليان جەنە باسقا دا كٶپتەگەن تٸلدە ەركٸن ەن ورىندايدى.
ۇستانىمىنان اينىمايتىن ٶنەر يەسٸ
ديماش تەك ەرەكشە داۋىسىمەن ەمەس, ٶمٸرلٸك ۇستانىمىمەن دە كٶپتٸڭ قۇرمەتٸنە يە.
2019 جىلى ول اقش-تىڭ CBS تەلەارناسىنداعى The World's Best شوۋىنان ٶز ەركٸمەن كەتتٸ. سەبەبٸ جوبا اياسىندا بالالارمەن ٶنەر سايىسىنا تٷسۋٸ كەرەك بولعان. ديماش قازاق حالقىنىڭ دەستٷرٸندە ٷلكەننٸڭ كٸشٸمەن بەسەكەگە تٷسۋٸ ەمەس, كەرٸسٸنشە قولداۋ كٶرسەتۋٸ ماڭىزدى ەكەنٸن ايتىپ, بايقاۋدان باس تارتتى.
بۇل شەشٸم قازىلار اراسىندا تٷرلٸ پٸكٸر تۋدىرعانىمەن, ەلەمنٸڭ تٷكپٸر-تٷكپٸرٸندەگٸ جانكٷيەرلەرٸ ونىڭ بۇل قادامىن جوعارى باعالادى.
شىعارماشىلىق ەركٸندٸك - باستى قاعيداسى
كٶپتەگەن ەلەمدٸك جۇلدىزداردان ٶزگەشە, ديماش پروديۋسەرلٸك ورتالىقتارمەن نەمەسە ٸرٸ مۋزىكالىق لەيبلدەرمەن جۇمىس ٸستەمەيدٸ. ول شىعارماشىلىق ەركٸندٸگٸن ساقتاۋدى جٶن كٶرەدٸ.
ەنشٸنٸڭ بارلىق جوباسىن ەكەسٸ جەتەكشٸلٸك ەتەتٸن DimashAli Creative Center جٷزەگە اسىرادى. كومپوزيتسييا ماماندىعى بويىنشا ماگيستر دەرەجەسٸن العان ديماش ٶز ەندەرٸنٸڭ مۋزىكاسىن ٶزٸ جازىپ, اۋقىمدى جوبالاردى دا ٶزٸ ەزٸرلەيدٸ. سونىڭ بٸرٸ - سوعىسقا قارسى يدەيانى كٶتەرەتٸن The Story of One Sky مۋزىكالىق فيلمٸ.
2026 جىلى ماكاودا ٶتكەن Weibo Gala ماراپاتىندا ول العاش رەت پروديۋسەر رەتٸندە حالىقارالىق سىيلىققا يە بولدى.
«Dears» - ەلەمدٸ بٸرٸكتٸرگەن جانكٷيەرلەر قاۋىمداستىعى
ديماشتىڭ جانكٷيەرلەرٸ ٶزدەرٸن Dears دەپ اتايدى. بۇل - ەلەمنٸڭ كٶپتەگەن ەلٸنەن قۇرالعان ٷلكەن قاۋىمداستىق.
ولار قايىرىمدىلىق شارالارىن ٶتكٸزٸپ, اعاش وتىرعىزادى, تٷرلٸ ەلەۋمەتتٸك باستامالاردى قولدايدى. تٸپتٸ ديماشتىڭ قۇرمەتٸنە گٷلدەردٸڭ جاڭا سۇرىپتارىنا ونىڭ ەسٸمٸ بەرٸلگەن جاعدايلار دا كەزدەسەدٸ.
ٶنەر يەسٸنٸڭ ٶزٸ بۇۇ-نىڭ حالىقارالىق كٶشٸ-قون ۇيىمىنىڭ (IOM) ٸزگٸ نيەت ەلشٸسٸ رەتٸندە بەيبٸتشٸلٸك پەن بٸرلٸكتٸ ناسيحاتتاپ كەلەدٸ. ونىڭ نيۋ-يوركتەگٸ Barclays Center مەن Madison Square Garden سەكٸلدٸ ەيگٸلٸ ساحنالارداعى كونتسەرتتەرٸ دە وسى قۇندىلىقتاردى دەرٸپتەۋگە باعىتتالعان.
تابىسقا جەتكٸزگەن قۇپييا
مۋزىكا ماماندارى ديماشتىڭ داۋىسىن ەلٸ كٷنگە دەيٸن ەرەكشە قۇبىلىس رەتٸندە باعالايدى. بٸرٸ ونىڭ ۆوكالدىق تەحنيكاسىن زەرتتەسە, ەندٸ بٸرٸ ونى «قايتالانباس داۋىس يەسٸ» دەپ اتايدى.
ال ديماشتىڭ ٶزٸ ٷشٸن مۋزىكا - ەڭ الدىمەن سەزٸم مەن تۋعان ەلٸنە قىزمەت ەتۋدٸڭ جولى. ەكە-شەشەسٸنٸڭ ايتۋىنشا, ونىڭ بٷگٸنگٸ جەتٸستٸگٸنٸڭ نەگٸزٸندە ۇزاق جىلعى ەڭبەك, قاتاڭ تەرتٸپ, زيياندى ەدەتتەردەن الىس بولۋ جەنە ٶنەرگە دەگەن شەكسٸز ماحاببات جاتىر.
ديماش قۇدايبەرگەن ٶز تالانتىنىڭ, ۇلتتىق بولمىسىنا دەگەن ادالدىعىنىڭ جەنە شىعارماشىلىق ەركٸندٸگٸنٸڭ ارقاسىندا كٶزٸ تٸرٸسٸندە-اق ەلەم مويىنداعان تۇلعاعا اينالدى.
