Qazaqstandyq boksshy, Olimpiada chempiony jáne kásipqoi bokstan IBO nusqasy boiynsha burynǵy álem chempiony Daniiar Eleýsinov AQSh-ta em qabyldai bastaǵanyn málimdedi, dep habarlaidy ult.kz.
Sportshy AQSh-qa otbasymen birge jazda Astanada bolǵan janjaldan keiin ketken. Ol kezde Eleýsinov mas kúiinde birneshe jol-kólik oqiǵasyn jasaǵany úshin 20 táýlikke qamaýǵa alynyp, jeti jylǵa kólik júrgizý quqyǵynan aiyrylǵan.
Keiin boksshy AQSh-ta alkogolge táýeldilikpen kúresip júrgenin aitqan.
«Qazir em qabyldaýdy bastadym. Biraq bul tek tamyrǵa dári jiberý emes, tolyqqandy, keshendi em. Mende bári jaqsy bolady dep oilaimyn. Sondyqtan bireýdi renjitkenime nemese aýyr sózder aitqanyma nazar aýdarmańyzdar. Kimniń basynan ótpeidi? Meniń jaman ádetim – efirge shyǵý. Biraq budan bylai olai bolmaidy dep oilaimyn. Bul dertten arylýǵa shyndap kiristim. Jaqynda qaita sapqa qosylamyn. Burynǵy kóńildi, baqytty Daniiar qaita oralady», – dedi sportshy Instagram Stories-inde.
Eleýsinov sońǵy jekpe-jegin 2025 jyldyń shildesinde AQSh-ta ótkizgen. Ol filippindik Djeims Bekondy tehnikalyq nokaýtpen jeńgen.
Buǵan deiin Daniiar Eleýsinov alkogolge táýeldi ekenin moiyndap, Erkebulan Toqtardy jekpe-jekke shaqyrǵan.
