Aqyn Ońaigúl Turjan Qasym-Jomart Toqaevtyń málimdemesine orai pikir bildirdi, dep habarlaidy QazAqparat.
«1348 jyly Italiiada taraǵan indet jaiynda oqyp, shoshyp ketkenim bar edi. Sol joly uly aqyn Franchesko Petrarkanyń aǵasy Djerarda degen dindar adam ǵana aýyrmai qalypty. Ol aýyryp jatqandardyń aýzyna sý tamyzyp, kóshede ólip jatqandardy ózi bir jerge jinap, jerlep júrgen. Sonda da aýyrmapty. Zertteýshiler muny ol adamnyń ishki sabyry men immýnitetiniń myqtylyǵymen túsindiredi. «Qorqaq adamdy it qapqysh» deidi ǵoi. Aitaiyn degenim, keshe Prezidentimiz Qasym-Jomart Toqaev eń aldymen bárimizdi sabyrǵa shaqyrdy. Kádimgidei tapsyrdy bárimizge. Bul - osy tótenshe jaǵdai kezinde Prezidentter beretin tapsyrmalardyń ishindegi eń mańyzdysy. Nege? Óitkeni adamdy úrei jeńse, kez kelgen aýyrtpalyq júz ese aýyrlaidy. Demek, bul virýsqa tótep beretin kúshimizdiń bar ekendigine degen ishki senim – bizdiń eń myqty qamalymyz. Prezident osyǵan úndedi, biraq mundai sabyrǵa da qandai da bir negiz kerek qoi. Memleket basshysy sol negizderdi sanamalap turyp aitty. Bizdiń árqaisymyz osy málimdemeni bar zeiinimizben oqyp shyǵýymyz kerek», - deidi Ońaigúl Turjan.
Onyń aitýynsha, bul málimdemede osy qiynshylyqty qalai jeńip shyǵatynymyzdyń ózindik óte myqty traektoriiasy kórsetilgen. Iaǵni, osy indetten aldyrmai-shaldyrmai óte alatyndyǵymyzǵa tastaban bolatyn jospar qurylǵan. Bizdiń kókeiimizdi sabyrǵa jeteleitin jáne memleketimizge degen senimniń qur uran emes, naqty isterge taban tirep turǵandyǵyn osydan kóre alamyz jáne, shynyda da, kóńil túkpirimizdegi sabyr men senimniń tini beki túsedi.
«Zeinetaqy men memlekettik kómekti 10 paiyzǵa ósirmek, iaǵni osyndai jáne basqa da áleýmettik qoldaý sharalaryna memleket 200 milliard teńge qarjy bólýdi josparlady. Qazir jumyssyz qalǵandar men eshqaida resmi tirkelmei óz betimen kún kórip júrgenderge tótenshe jaǵdai kezinde 42 500 teńgeden tólem jasaýdy júzege asyryp jatyr. Bul 100-200 adam emes, 3 millionnan astam azamattardy qamtidy eken. Mindetti áleýmettik saqtandyrýda joq azamattarǵa ártúrli dárigerlik kómekti tegin berýdi mindettedi, áleýmettik jaǵdaiy tómen múgedekter jáne taǵy da basqa memlekettiń arnaiy belgilengen sanattaǵy 800 myńnan astam adamadaryna tegin tamaq berilip jatyr. Shaǵyn jáne orta biznes ókilderin biylǵy 1 qazanǵa deiin eńbekaqy tóleý qorynan ustalatyn salyqtan bosatty. Janarmaidy naryqtaǵy baǵasynan 15 paiyzǵa deiin arzandatý mindetin qoidy. Bul - ulan-ǵaiyr kómek. Kóktemgi aýyl sharýashylyǵy jumystaryn der kezinde bastaý jáne óz deńgeiinde júrgizý - qazirgi jaýaptynyń da jaýapty jumysy. Óitkeni aýyl sharýashylyǵy – dál osy kezeńdegi eń mańyzdynyń da mańyzdysy bolǵaly tur. Sebebi, ony qazir qoldap jibermes, astyq ónimderi óspei qalsa, qiyndyqtyń kókesi sonda bolady. Nansyz qalamyz. Mine, qaýip qaida jatyr. Memleket sol qaýiptiń aldyn alýdyń biz buryn-sońdy estip kórmegen sharalary jasalatyn josparyn qurdy», - deidi ol.
Aqyn qazir halyq alańdaýly ekenin aitty.
«Halyq kúndelikti jumysyn jasaýdyń ózine tereń boilai almai otyr. Óitkeni myna óte qaýipti indet qai jaǵyńnan ańdyp turǵanyn bilmeisiń. Bul - pishologiialyq jaǵynan halyqtyń eńsesin basyp turatyn hal. Osyndai aýyr kezde eldi tártipke shaqyryp, Prezident sol tártipti saqtap otyrǵanymyz úshin alǵys aitty. Sebebi, memleket pen jergilikti jerdegi bilik oryndary joǵaryda aitylǵan jaǵdailardy júzege asyramyz dep janushyryp jatqanda, biz tártipke baǵynbai «nege 42 500?», «nege az», «maska qaida», «basqa qaida» dei bersek, bereke ketedi. Maskany ózińiz tigip alyńyz. Basqasyn memleket oilastyryp jatyr. Dál qazir qanaǵatshyldyq kontseptsiiasy asa mańyzdy bolyp tur. Jasyrynyp toi jasap, qudalyqqa baryp bytyrap júrsek, jasalyp jatqan jumystardyń tiimdiligi azaiady. Sebebi aýrý odan saiyn taraidy. Bul tótenshe jaǵdaidyń merzimin uzarta túsedi. Sondyqtan, biz siiaqty qarapaiym halyqtyń memleketke kómegi – tártipke baǵyný. Úide otyrý arqyly biz tótenshe jaǵdai merziminiń uzaryp ketpeýine óte joǵary deńgeide yqpal ete alamyz», - deidi Ońaigúl Turjan.
.jpeg)