Qazaqstandyq tennisshi Aleksandr Býblik reseilik sportshylardyń Qazaqstan quramasy sapynda óner kórsetýiniń sebebin túsindirdi. Ol bul týraly Vitia Kravchenkomen áńgimesinde aityp, óziniń jáne Elena Rybakinanyń mansabyn mysalǵa keltirdi, dep habarlaidy ult.kz.
Býbliktyń aitýynsha, tennistegi kásibi mansapty bastaý úshin sportshyǵa aitarlyqtai qarjy qajet. Jattyqtyrýshy, halyqaralyq jarystarǵa ushý, oqý-jattyǵý jiyndary men týrnirlerge qatysý shyǵyndaryn talap etedi.
Tennisshiniń sózinshe, Reseide onyń jáne basqa da jas sportshylardyń áleýetine tiisti deńgeide mán berilmegen. Al Qazaqstan olarǵa qoldaý kórsetip, kásibi turǵyda ósýge múmkindik bergen.
Áńgime barysynda Vitia Kravchenko Býblik pen Elena Rybakinany Resei quramasynan kórgisi keletinin aitqan. Alaida Býblik mundai qyzyǵýshylyq sportshylar úlken jetistikke jetkennen keiin ǵana paida bolǵanyn atap ótti.
«Lena osyndai deńgeige Qazaqstannyń arqasynda jetti», – dedi Býblik.
Ol Rybakinanyń Reseide qalǵan jaǵdaida dál osyndai nátijege jete alar-jetpesin eshkim naqty aita almaitynyn aitty.
Býblik óz mansabyna qatysty ustanymyn da ashyq bildirdi.
«Men – qazaqstandyq sportshymyn», – dedi tennisshi.
Onyń aitýynsha, Qazaqstanmen bailanysy sporttyq mansaby aiaqtalǵannan keiin de jalǵasady. Býblik muny qiyn kezeńde ózine qoldaý kórsetken adamdarǵa degen alǵysy retinde túsindirdi.
Aita keteiik, 2008 jyldan beri 14 reseilik tennisshi Qazaqstannyń sporttyq azamattyǵyn qabyldap, el namysyn qorǵaǵan.
Býbliktyń pikirinshe, sportshynyń jetistigin tek onyń týǵan jerimen bailanystyrý durys emes. Onyń kásibi qalyptasýyna senim bildirip, naqty qoldaý kórsetken eldiń de úlesi bar.
