Qazaqstanda koronavirýs pandemiiasynyń qurbany bolǵan azamattardy eske alýǵa bailanysty búgin - Jalpyulttyq aza tutý kúni. Nur-Sultan ýaqytymen saǵat 12:00-de búkil el boiynsha bir minýttyq únsizdik jariialanady.
Elimizde qalyptasqan ahýalǵa bailanysty halyqqa úndeý jasaǵan QR Prezidenti Qasym-Jomart Toqaev 13 shildeni – Ulttyq aza tutý kúni dep jariialaityny týraly málim etken bolatyn. Tiisti ókimge Memleket basshysy kelesi kúni qol qoidy.
«Ár qazaq – meniń jalǵyzym» degendei, Ár azamatymyzdyń qazasy meniń júregime qatty batady. Mynaý alapat indet aramyzdan talai asyldarymyzdy julyp áketýde. Búginde qara jamylyp otyrǵan azamattardyń qaiǵylaryna ortaqtasyp, kóńil aitamyn. Sol úshin 13 shildeni – Ulttyq aza tutý kúni dep jariialaimyn. Biraq, bizdiń kúresimiz jalǵasa beredi», - dedi Qasym-Jomart Toqaev óz úndeýinde.
Prezident búkil kúsh jigerimizdi jinap, indetpen kúrese berýimiz kerektigin aitty.
Memleket basshysy koronavirýsqa qarsy qosymsha sharalardy da atap ótti: naqtyraq aitqanda, elde alǵashqy meditsinalyq-sanitarlyq kómek kúsheitilip, aýrýhanalarda tósek oryndarynyń sany arttyrylady. Qoldanystaǵy zerthanalar testileýge qol jetimdilikti arttyrý úshin qaita jabdyqtalyp, PTR-testileý úshin 8 mobildi ortalyq qurylady. Ondai ortalyqtar aýyl-aimaqtarda da ashylmaq.
Esterińizge sala keteiik, Qazaqstanda koronavirýs infektsiiasyn juqtyrýdyń alǵashqy oqiǵasy osy jyldyń 13 naýryzynda tirkelgen edi. COVID-19 Germaniiadan kelgen eki azamattan anyqtaldy. 26 naýryzda Qazaqstanda koronavirýstan bolǵan birinshi ólim týraly habarlama keldi - 64 jastaǵy áiel qaitys boldy.
QR Prezidenti janyndaǵy Qazaqstan strategiialyq zertteýler institýtynyń bólim basshysy Alýa Joldybalinanyń aitýynsha buǵan deiin 4 sáýirde Qytaida, 22 mamyrdan bastap 3 kúnge – AQSh-ta, 27 mamyrdan bastap 10 kúnge – Ispaniiada aza tutý kúni jariialanǵan. Óitkeni osy memleketterde atalǵan aýrýdan edáýir adam shyǵyny bolǵan edi.
Sonymen birge saiasattanýshy Qazaqstanda 2019 jyldyń 28 jeltoqsanynda jariialanǵan Jalpyulttyq aza tutý kúninen keiin araǵa jarty jyl ýaqyt salyp, koronovirýs indetinen adamdardyń qaza bolýyna bailanysty qaraly kún jariialanǵanyn aitady. Jalpy táýelsizdik alǵannan bastap, iaǵni 1991 jyldan beri Qazaqstanda aza tutý kúni toǵyzynshy ret jariialanyp otyr.
12 shildedegi jaǵdai boiynsha Qazaqstanda koronavirýs infektsiiasyn 58 253 adam juqtyrǵan. 33814 adam jazylyp shyǵyp, 264 adam kóz jumǵan.
