Aqtóbede sońǵy táýlikte 7 adamnan koronavirýs infektsiiasy anyqtaldy. Qazir epidjaǵdai turaqty. Tipti birqatar shekteý sharasy jeńildeýi múmkin, dep habarlaidy "Ult aqparat".
Ótken táýlikte óńirde 7 adamǵa COVID-19 diagnozy qoiyldy. Onyń beseýi — Aqtóbe qalasynyń turǵyny. Al ekeýi Mártóktegi shekara beketinde tirkeldi. Jalpy, óńirde kúni búginge deiin 3377 jaǵdai anyqtalsa, onyń 97 paiyzǵa jýyǵy jazyldy. Qazirgi kezde oblys boiynsha 378 adam úi karantininde jatyr. Olardy dáriger óz baqylaýyna aldy. Mamandardyń aitýynsha, Aqtóbe oblysy qazir «jasyl aimaqta».
«Aqtóbe oblysynyń bas memlekettik sanitarlyq dárigeriniń jańa qaýlysy ázirlenip jatyr. Birqatar shekteý sharasy báseńdeýi múmkin. Ásirese oqýshy sany 300-den aspaityn mektepter II-toqsannan bastap dástúrli bilim berý úrdisine kóshedi. Dál qazirgidei epidjaǵdai saqtalsa, shekteý jeńildeidi. Tek araqashyqtyqty saqtap, maska taǵyp, antisektip qoldanǵan jón. Egde jastaǵy adamdardyń kópshilik oryndarǵa barmaǵany durys», - dedi Aqtóbe oblysynyń memlekettik sanitariialyq-epidemiologiialyq baqylaý departamenti basshysynyń mindetin atqarýshy Muhtar Serbaev.
Aita keteiik, 6-qazanda shekaradan ótkenderge PTR test mindetteldi. Sodan beri shekaradan 18 myńnan astam adam ótip, 18 adamnan koronavirýs infektsiiasy anyqtaldy.
«Qazir emdeý mekemelerinde 69 naýqas em qabyldap jatyr. Onyń 14-i infektsiialyq statsionardaǵy dárigerler baqylaýynda. Pnevmoniiadan em qabyldap jatqan 29 naýqas bar. Olar Aqtóbe qalasy men birneshe aýdandaǵy aýrýhanada jatyr. Ókpeni jasaldy jeldetý apparatyna qosylǵan eshkim joq», - dedi oblystyq densaýlyq saqtaý basqarmasy basshysynyń orynbasary Bekbolat Izbasarov.
