اقتٶبەدە سوڭعى تەۋلٸكتە 7 ادامنان كوروناۆيرۋس ينفەكتسيياسى انىقتالدى. قازٸر ەپيدجاعداي تۇراقتى. تٸپتٸ بٸرقاتار شەكتەۋ شاراسى جەڭٸلدەۋٸ مٷمكٸن, دەپ حابارلايدى "ۇلت اقپارات".
ٶتكەن تەۋلٸكتە ٶڭٸردە 7 ادامعا COVID-19 دياگنوزى قويىلدى. ونىڭ بەسەۋٸ — اقتٶبە قالاسىنىڭ تۇرعىنى. ال ەكەۋٸ مەرتٶكتەگٸ شەكارا بەكەتٸندە تٸركەلدٸ. جالپى, ٶڭٸردە كٷنٸ بٷگٸنگە دەيٸن 3377 جاعداي انىقتالسا, ونىڭ 97 پايىزعا جۋىعى جازىلدى. قازٸرگٸ كەزدە وبلىس بويىنشا 378 ادام ٷي كارانتينٸندە جاتىر. ولاردى دەرٸگەر ٶز باقىلاۋىنا الدى. مامانداردىڭ ايتۋىنشا, اقتٶبە وبلىسى قازٸر «جاسىل ايماقتا».
«اقتٶبە وبلىسىنىڭ باس مەملەكەتتٸك سانيتارلىق دەرٸگەرٸنٸڭ جاڭا قاۋلىسى ەزٸرلەنٸپ جاتىر. بٸرقاتار شەكتەۋ شاراسى بەسەڭدەۋٸ مٷمكٸن. ەسٸرەسە وقۋشى سانى 300-دەن اسپايتىن مەكتەپتەر ٸٸ-توقساننان باستاپ دەستٷرلٸ بٸلٸم بەرۋ ٷردٸسٸنە كٶشەدٸ. دەل قازٸرگٸدەي ەپيدجاعداي ساقتالسا, شەكتەۋ جەڭٸلدەيدٸ. تەك اراقاشىقتىقتى ساقتاپ, ماسكا تاعىپ, انتيسەكتيپ قولدانعان جٶن. ەگدە جاستاعى ادامداردىڭ كٶپشٸلٸك ورىندارعا بارماعانى دۇرىس», - دەدٸ اقتٶبە وبلىسىنىڭ مەملەكەتتٸك سانيتارييالىق-ەپيدەميولوگييالىق باقىلاۋ دەپارتامەنتٸ باسشىسىنىڭ مٸندەتٸن اتقارۋشى مۇحتار سەرباەۆ.
ايتا كەتەيٸك, 6-قازاندا شەكارادان ٶتكەندەرگە پتر تەست مٸندەتتەلدٸ. سودان بەرٸ شەكارادان 18 مىڭنان استام ادام ٶتٸپ, 18 ادامنان كوروناۆيرۋس ينفەكتسيياسى انىقتالدى.
«قازٸر ەمدەۋ مەكەمەلەرٸندە 69 ناۋقاس ەم قابىلداپ جاتىر. ونىڭ 14-ٸ ينفەكتسييالىق ستاتسيونارداعى دەرٸگەرلەر باقىلاۋىندا. پنەۆمونييادان ەم قابىلداپ جاتقان 29 ناۋقاس بار. ولار اقتٶبە قالاسى مەن بٸرنەشە اۋدانداعى اۋرۋحانادا جاتىر. ٶكپەنٸ جاسالدى جەلدەتۋ اپپاراتىنا قوسىلعان ەشكٸم جوق», - دەدٸ وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ٸزباساروۆ.
