«Gremmi» syilyǵynyń uiymdastyrýshylary kelesi jyldan bastap engiziletin «Úzdik aziialyq pop-mýzyka» nominatsiiasyna bailanysty BTS tobynyń baiqaýǵa qatysýdan bas tartýyna qatysty málimdeme jasady, dep habarlaidy ult.kz.
Álemge tanymal kei-pop toby BTS jańa «Arirang» albomyn atalǵan nominatsiiaǵa usynbaitynyn jariialaǵan. Mýzykanttar bul sheshimin mýzykanyń til men geografiialyq shekaraǵa bólinbeýi tiis degen ustanymymen túsindirdi.
«Mýzykanyń adamdardyń júregine eshqandai shekara men tilge qaramastan jetkenin qalaimyz. Bizdi árdaiym qoldaityn ARMY jankúierlerine alǵys aitamyz», – dedi top músheleri.
Bul sheshimge qatysty pikir bildirgen Dybys jazý akademiiasynyń (Recording Academy) bas direktory Harvi Meison kishi BTS-tiń tańdaýyna qurmetpen qaraitynyn aitty.
«BTS-tiń biyl "Gremmi" syilyǵyna qatyspaý týraly sheshimi meni qynjyltady. Degenmen mýzykamen ainalysatyn adam retinde olardyń tańdaýyn túsinemin jáne qurmetteimin», – dedi ol.
Meisonnyń aitýynsha, «Aziialyq pop-mýzyka» nominatsiiasy Aziiadaǵy pop-mýzykanyń tereńdigi men janrlyq ártúrliligin, sondai-aq onyń álemdik tanymaldyǵynyń artýyn atap ótý úshin qurylǵan.
Ol jańa sanattyń maqsaty oryndaýshylardy bólý emes, kerisinshe, kóbirek ártistiń eńbegin baǵalaýǵa múmkindik berý ekenin atap ótti. Sonymen qatar, janrlyq nominatsiiaǵa ótinim bergen oryndaýshylar «Jyl albomy», «Jyl áni», «Jyl jazbasy» siiaqty negizgi «Gremmi» marapattaryna da úmitker bola alatynyn jetkizdi.
Eske salsaq, 2027 jylǵy «Gremmi» syilyǵynda alǵash ret «Úzdik aziialyq pop-mýzyka» nominatsiiasy engiziledi. Bul sanatqa aziialyq tilderdiń birinde nemese birnesheýinde oryndalǵan pop-ánder men albomdar usynylady.
