Astanada memleketke qaitarylǵan úsh elitalyq páter qaita saýdaǵa shyǵaryldy. Alǵashqy saýda-sattyqta satyp alýshy tabylmaǵandyqtan, olardyń baǵasy 33 millionnan 109 million teńgege deiin tómendetilgen, dep habarlaidy ult.kz.
Eń qymbat páter Green Village turǵyn úi kesheninde ornalasqan. Aýdany 231 sharshy metr bolatyn baspana qyrkúiekte 214 million teńgege usynylǵanymen, ótpei qalǵan. Endi onyń baǵasy 149 million teńgege deiin túsirildi.
Al elordanyń «Parij oramy» turǵyn úi keshenindegi aýdany 309,5 sharshy metr eki deńgeili páterdiń quny 363 millionnan 254 million teńgege arzandady. Bul – úsh nysannyń ishindegi eń úlken jeńildik.
Sol keshendegi aýdany 93 sharshy metr taǵy bir páterdiń baǵasy 112 millionnan 79 million teńgege tómendetilgen.
Osylaisha, úsh páterdiń jalpy quny 207 million teńgege arzandap otyr. Kezekti saýda-sattyq 25 qarasha kúni saǵat 12:00-de baǵany kóterý ádisimen ótedi.
Jyljymaityn múlikterdi Qaitarylǵan aktivterdi basqarý kompaniiasy (QABK) satylymǵa shyǵarǵan. Kompaniianyń málimetinshe, bul – zańsyz alynǵan qarajatqa satyp alynyp, keiin memleketke qaitarylǵan baspanalar. Alaida burynǵy ieleriniń esimderi zań talaptaryna sáikes jariialanbaidy.
QABK saýda-sattyq ótpei qalǵan jaǵdaida da múlikti satý jumystaryn jalǵastyratynyn habarlady. Eger memlekettik organdardan resmi suranys tússe, páterlerdi olardyń balansyna berý máselesi qaralýy múmkin.
Satylymnan túsken qarajat Arnaiy memlekettik qorǵa aýdarylyp, áleýmettik jáne ekonomikalyq jobalardy qarjylandyrýǵa jumsalady.