Batys Qazaqstan oblysynda órtti sóndirý kezinde tótenshe jaǵdailar qyzmetiniń vzvod komandiri Mirshat Haliýllin qaza boldy. Marqumnyń týystarynyń aitýynsha, ony órt sóndirý kóligin basqarǵan áriptesi qaǵyp ketken, dep habarlaidy ult.kz.
Qaiǵyly oqiǵa 3 qyrkúiekte Taý aýyldyq okrýginiń aýmaǵynda bolǵan. Marqumnyń ákesi Mars Haliollaulynyń aitýynsha, uly kezekshilik kezinde órt shyqqany týraly habar alyp, oqiǵa ornyna attanǵan.
Onyń sózinshe, órt sóndirý kóliginiń tizgininde Mirshatpen bala kezinen birge ósken, birge oqyǵan ári bir mekemede qyzmet etken áriptesi bolǵan.
«Órtti sóndirý kezinde áriptesi abaisyzda ony qaǵyp ketken. Júrgizýshi tútinniń saldarynan kórmei qalǵanyn aitty. Alǵashynda baiqaǵanymen, keiin kózden tasa bolyp ketken. Keshirim surady. Tótenshe jaǵdailar departamentiniń ókilderi kelip, kóńil aityp, kómek usyndy», – dedi marqumnyń ákesi.
Mirshat Haliýllin meditsinalyq mekemege jetkizilgenge deiin kóz jumǵan.
Tótenshe jaǵdailar ministrligi qyzmetkerdiń qyzmettik mindetin atqarý kezinde qaza bolǵanyn rastady. Vedomstvo marqumnyń otbasyna qajetti kómek kórsetilip jatqanyn málimdedi.
Al Batys Qazaqstan oblysynyń Politsiia departamenti oqiǵa boiynsha qylmystyq is qozǵalǵanyn habarlady. Qazir qaiǵyly jaǵdaidyń barlyq mán-jaiy tergeý aiasynda anyqtalyp jatyr.
