Iadrolyq derjava bolǵanymyzda Soltústik Koreia siiaqty bolar edik. Búgin AQSh-qa resmi saparyn qorytyndylap, qazaqstandyq jáne sheteldik BAQ ókilderine suhbat bergen Elbasy Nursultan Nazarbaev osylai dedi, dep habarlaidy QazAqparat.
«AQSh, Resei jáne Qytaidan keiingi álemdegi tórtinshi iadrolyq arsenaldan sanaly túrde bas tarttyq. Bizde 1100 oqtumsyq, Amerika Qurama Shtattarynyń territoriiasyna deiin jete alatyn 110 dana SS-18 zymyrandary boldy. Sol kezde olardy qaldyryp, iadrolyq derjavaǵa ainalý, barlyǵyn qorqytý tóńireginde kóptegen pikirtalas boldy. Degenmen halyq meniń sheshimime qoldaý kórsetti jáne biz durys jasadyq», - dedi Nursultan Nazarbaev.
Elbasy sonyń arqasynda Qazaqstan 25 jyldyń ishinde álemniń barlyq elderiniń senimine ie bolyp, halyqaralyq arenada bedeli óskenin, 300 mlrd dollardan astam tikelei shetel investitsiiasyn tarta alǵanyn, sol investitsiialar el ekonomikasyn kótergendigin aitty.
«Al eger biz iadrolyq derjava bolǵanymyzda qazir Soltústik Koreia siiaqty bolar edik. Sondyqtan da bizdiń iadrolyq qarýdan bas tartqan el retinde moraldyq quqymyz bar. Men osy moraldyq quqyǵymyzdy paidalana otyryp, Iranmen, ózim jaqsy biletin Prezidenti Homeinimen sóilesip, bizdiń bas tartqanymyzdy aittym. «Sizder 10 atom bombasyna ie bolarsyzdar, al álemde olardyń sany 7,5 myń. Al bul Táýelsizdikke qorǵan bola ma?», dedim. Táýelsizdikti barlyq memlekettermen jaqsy qarym-qatynas, eldiń bedeli, igi esimi beredi. Dál sol siiaqty Soltústik Koreiaǵa da sóz arnap, iadrolyq qarýdyń Táýlesizdiktiń tiregi emes kerisinshe qozdyrǵyshy bolatyndyǵyn aitamyn. Qazir olar toqtap, búkil álemge bas tartatyndyǵyn aitar bolsa, biz siiaqty tatý-tátti qarym-qatynasty olar da ala alar edi. Odan keiin investitsiia kelip, ol eldi damytyp, halyqtyń turmys-tirshiligi jaqsara túsedi», - dedi Nursultan Nazarbaev.
