Blits shahmatynan úsh dúrkin álem chempiony Bibisara Asaýbaeva Qazaqstan Respýblikasy Týrizm jáne sport ministrliginiń jaýabyna qatysty pikir bildirip, shahmattyń «basym sport túrleriniń qataryna jatpaityny» týraly ustanymǵa kúmán keltirdi, dep habarlaidy ult.kz.
Shahmatshy áleýmettik jelidegi paraqshasynda ministrliktiń resmi jaýabyn birneshe ret oqyp shyqqanyn aityp, bul málimdemeniń Memleket basshysy Qasym-Jomart Toqaev jariialaǵan ziiatkerlik áleýetti damytý baǵytymen qanshalyqty úilesetini jóninde suraq qoiǵan.
Asaýbaevanyń aitýynsha, álemniń jetekshi elderinde shahmat tek sport emes, strategiialyq oilaý men intellektýaldyq kapitaldyń kórsetkishi retinde baǵalanady.
«Eger shahmat basym baǵytqa jatpasa, onda Prezident maǵan II jáne III dárejeli «Barys» ordenderin qandai eńbegim úshin tabystady?», - dep jazdy sportshy.
Shahmatshy qazirgi ýaqytta álemdik reitingte besinshi orynda turǵanyn atap ótip, óz jetistikterine jetýde ata-anasynyń qoldaýy sheshýshi ról atqarǵanyn aitty. Onyń pikirinshe, Qazaqstannyń bolashaǵy intellekt, bilim, ǵylym jáne adami kapitaldyń sapasymen aiqyndalady.
Sondai-aq Bibisara Asaýbaeva Týrizm jáne sport ministrliginiń ustanymy Prezident belgilegen damý baǵytyna sáikes kele me degen máseleni kóterdi.
Eske salsaq, buǵan deiin Bibisara Asaýbaeva Memleket basshysyna videoúndeý joldap, kómek suraǵan bolatyn. Norway Chess-2026 bedeldi týrnirindegi jeńisinen keiin ol Týrizm jáne sport ministrligi men shahmat federatsiiasy tarapynan qarjylandyrý máseleleri bar ekenin málimdegen edi. Sportshynyń saýalyna Týrizm jáne sport ministrligi jaýap berdi.
