Qazaqstanda balabaqshaǵa kezekke turý júiesin ózgertýge baǵyttalǵan vaýcherlik qarjylandyrý piloty oń nátije kórsetip otyr. Joba Memleket basshysy Qasym-Jomart Toqaevtyń tapsyrmasy boiynsha Oqý-aǵartý ministrligi ázirlegen jańa mehanizm negizinde iske asýda, dep habarlaidy ult.kz.
Buǵan deiin memlekettik tapsyrys belgili bir balabaqshaǵa bekitilip, biýdjet qarjysy uiymdarǵa bólinetin. Mundai tásilde kezektiń uzaq bolýy, balabaqshalar arasynda básekelestiktiń tómendigi jáne biýdjet qarajatyn tiimsiz paidalaný siiaqty máseleler týyndaǵan.
Vaýcherlik júiede basty ózgeris – qarjy balabaqshaǵa ǵana emes, balanyń ózine bailanystyrylady. Iaǵni balaǵa vaýcher berilip, ata-ana sol vaýcher arqyly balabaqshadaǵy ornyn tańdai alady. Bul mektepke deiingi uiymdardyń ata-ana men balaǵa sapaly qyzmet usynýyna básekelestikti arttyrady.
Jańa júiede arnaiy tsifrlyq mehanizm de engizilgen. Ol usynylǵan málimetterdiń durystyǵyn tekserip, kúmándi jaǵdailar men zań buzýshylyqtardy anyqtaýǵa múmkindik beredi. Osylaisha jalǵan kontingentti tirkeý jáne biýdjet qarajatyn tiimsiz paidalaný táýekeli azaiady.
Qazir vaýcherlik qarjylandyrý piloty 20 qala men 23 aýdanda júzege asyrylyp jatyr. Jobaǵa shamamen 6 myń mektepke deiingi uiym qatysady. Osy ýaqytqa deiin 1 millionnan astam vaýcher berilgen.
Jańa júieniń nátijesinde mektepke deiingi tárbiemen qamtylǵan balalar sany artqan. Al 2-6 jastaǵy kezekte turǵan balalar sany 160 myńnan 23 myńǵa deiin azaiǵan.
Taǵy bir mańyzdy nátije – biýdjet qarajatynyń únemdelýi. Pilot aiasynda 35 mlrd teńgeden astam qarjy únemdelgen. Únemdelgen qarajat esebinen qosymsha vaýcherler berilip jatyr.
Oqý-aǵartý ministrliginiń málimetinshe, jańa model balabaqshaǵa qabyldaý protsesiniń ashyqtyǵyn arttyryp, biýdjet qarajatyn tiimdi paidalanýǵa jáne mektepke deiingi uiymdar arasyndaǵy básekelestikti kúsheitýge múmkindik beredi.
