Baian Alagózova Threads-tegi dini taqyryptaǵy jazbasyna qatysty jańa pikir bildirip, senýshilerdiń kóńiline tigen sózderi úshin shyn júrekten keshirim surady, dep habarlaidy ult.kz.
Prodiýser buǵan deiingi jazbasy qoǵamda úlken pikirtalas týdyrǵanyn aityp, bul taqyrypqa jalǵasyn jazýǵa týra kelgenin jetkizdi.
«Meniń sózderim dindar adamdardyń kóńiline tidi, shyn júrekten keshirim suraimyn. Men ár adamǵa jáne ár dinge qurmetpen qaraimyn, tek bul bireýge ziian keltirmegen jaǵdaida», – dep jazdy Alagózova.
Ol ózin dinge qarsy adam retinde kórsetpeýdi surady. Aitýynsha, onyń qarsylyǵy dinniń ózine emes, radikaldy jáne fanatikalyq nasihatqa, sondai-aq ózge adamdarǵa belgili bir dini dogmalardy kúshtep tańatyndarǵa baǵyttalǵan.
Alagózova sonymen qatar áielderdiń quqyqtaryna qatysty máselelerdi kóterdi. Ol qyzdardyń erte jasta turmysqa shyǵýyna, bilim men meditsinalyq kómek alýyna shekteý qoiylýyna, áielderdiń qoǵamdaǵy derbestigin shekteýge jáne zorlyq-zombylyqqa úzildi-kesildi qarsy ekenin aitty.
«Qyzyńyzdyń nemese ápkeńizdiń jeke tulǵa emes, bireýdiń qosymshasy bolǵanyn qalaisyz ba? Onyń ruqsatsyz qoǵamda kórinýine nemese sóileýine bolmai ma? Ózin jáne balalaryn qarapaiym túrde qorǵai almaýy kerek pe? Men buǵan úzildi-kesildi qarsymyn!», – dedi ol.
Prodiýser óz sózinde Qazaqstannyń ulttyq mádenieti men dástúrine qatysty ustanymyn da atap ótti.
«Men árqashan ulttyq mádeni kodymyzdy qorǵadym jáne qorǵai beremin. Men eshqashan óz tamyrymnan, ata-babamnan jáne dástúrlerimnen joǵary eshteńe qoimaimyn. Bul – meniń tańdaýym jáne meniń jolym. Men zaiyrlylyqty qoldaimyn», – dep jazdy Baian Alagózova.
Osylaisha, ol óziniń buǵan deiingi «72 pák qyz», jumaq pen tozaq jáne dini nasihat týraly aitqan sózderine bailanysty ustanymyn túsindirip, din men radikaldy dini nasihatty bir-birinen ajyratatynyn jetkizdi.
Aita keteiik, buǵan deiin Baian Alagózovanyń dini jazbasyna qatysty aryz túsken bolatyn.
