Búgin — Qazaqstanda qaza tapqan áskeri qyzmetshilerge bailanysty aza tutý kúni. Qaiǵyly habardy sarbazdardyń otbasylaryna qalai jetkizilgeni qoǵamda túrli narazy pikir týǵyzdy, dep habarlaidy ult.kz.
Osydan «Biz qaraly habardy jetkizýdiń óz mádenieti bolǵan halyq ekenimizdi umytyp ketken joqpyz ba?» degen suraq eriksiz kókeige oralady.
Qazaq qazany et jaqyn adamyna birden: «Pálenshe qaitys boldy» dep aita salmaǵan. Qaraly habardy jetkizetin adam aldyn ala baryp, jaǵdaidy ańdap, adamnyń psihologiialyq turǵydan qabyldaýyna múmkindik bergen. Tipti estirtý qara sózben ǵana emes, óleńmen, kúimen de aitylǵan. «Aqsaq qulan» kúii osy dástúrdiń áigili úlgisi retinde kórsetiledi.
Qazaqtyń estirtýinde qaraly habardyń ózi ǵana emes, sol habardy estigen adamnyń ar jaǵynda qalai qalatyny mańyzdy.
Estirtý dástúri Qazaqstannyń materialdyq emes mádeni murasynyń ulttyq tizimine engizilgen dástúrlerdiń birine jatqyzylǵan.
Biz tehnologiia damyǵan saiyn aqparatty tez jetkizýdi úirendik. Biraq adamnyń júregin jaralamai, durys jetkizýdi umytyp ketken joqpyz ba?
Qaiǵyny eshbir dástúr jeńildete almaidy. Balasynan, baýyrynan, aǵasynan aiyrylǵan adamnyń júregindegi aýyrtpalyqty eshqandai sóz alyp tastamaidy. Biraq qazaq sol sózdiń de óz jaýapkershiligi bar ekenin bilgen.
Sondyqtan estirtý — ótkenniń sarqynshaǵy emes. Ol — adamnyń janyn jaralamai, eń aýyr shyndyqty jetkizýdiń mádenieti.
Bálkim, búgin bizge osy dástúrdi dál sol qalpynda qaitarý emes, onyń eń basty qaǵidasyn — qaraly habardy adamnyń júregin eskere otyryp jetkizýdi qaita úirený kerek shyǵar.
17 áskerdiń 14-i qaza tapty
24 qyrkúiekte Mańǵystaý oblysynda Qazaqstan Qarýly kúshteri Áskeri-teńiz kúshteriniń oqý-jattyǵýy kezinde áskeri qyzmetshiler Kaspii teńizine batyp ketti.
Resmi aqparatta 17 áskeri qyzmetshi sýǵa ketkeni, onyń úsheýi qutqarylyp, 14-i qaza tapqany habarlandy.
Áleýmettik jelilerde qaza tapqan áskeri qyzmetshilerdiń týǵan-týystaryna qaraly habardyń jetkizilý sáti túsirilgen video tarady. Kadrlarda marqumdardyń jaqyndary temir qaqpanyń ar jaǵynda turǵany kórinedi. Al qaza tapqan sarbazdardyń tizimin jas áskeri qyzmetshi oqyp turǵan. Qaraly habardy estigen týystary jylap, daýystap, qaqpany uryp jatyr. Bul kórinis áleýmettik jeli qoldanýshylarynyń narazylyǵyn týǵyzyp, qaraly habardy jetkizýdiń ádebi men tártibine qatysty pikirtalasqa sebep boldy.
Oqi otyryńyz: Qazaqstandyqtar qaza tapqan sarbazdardy qaǵazdan oqyp estirtkenge shaǵymdandy
Aita keteiik, 25 qyrkúiek Memleket basshysynyń ókimimen Qazaqstanda Mańǵystaý oblysynda qyzmettik mindetin atqarý kezinde qaza bolǵan áskeri qyzmetshilerge bailanysty jalpyulttyq aza tutý kúni bolyp jariialandy.
