بٷگٸن — قازاقستاندا قازا تاپقان ەسكەري قىزمەتشٸلەرگە بايلانىستى ازا تۇتۋ كٷنٸ. قايعىلى حاباردى ساربازداردىڭ وتباسىلارىنا قالاي جەتكٸزٸلگەنٸ قوعامدا تٷرلٸ نارازى پٸكٸر تۋعىزدى, دەپ حابارلايدى ult.kz.
وسىدان «بٸز قارالى حاباردى جەتكٸزۋدٸڭ ٶز مەدەنيەتٸ بولعان حالىق ەكەنٸمٸزدٸ ۇمىتىپ كەتكەن جوقپىز با?» دەگەن سۇراق ەرٸكسٸز كٶكەيگە ورالادى.
قازاق قازانى ەت جاقىن ادامىنا بٸردەن: «پەلەنشە قايتىس بولدى» دەپ ايتا سالماعان. قارالى حاباردى جەتكٸزەتٸن ادام الدىن الا بارىپ, جاعدايدى اڭداپ, ادامنىڭ پسيحولوگييالىق تۇرعىدان قابىلداۋىنا مٷمكٸندٸك بەرگەن. تٸپتٸ ەستٸرتۋ قارا سٶزبەن عانا ەمەس, ٶلەڭمەن, كٷيمەن دە ايتىلعان. «اقساق قۇلان» كٷيٸ وسى دەستٷردٸڭ ەيگٸلٸ ٷلگٸسٸ رەتٸندە كٶرسەتٸلەدٸ.
قازاقتىڭ ەستٸرتۋٸندە قارالى حاباردىڭ ٶزٸ عانا ەمەس, سول حاباردى ەستٸگەن ادامنىڭ ار جاعىندا قالاي قالاتىنى ماڭىزدى.
ەستٸرتۋ دەستٷرٸ قازاقستاننىڭ ماتەريالدىق ەمەس مەدەني مۇراسىنىڭ ۇلتتىق تٸزٸمٸنە ەنگٸزٸلگەن دەستٷرلەردٸڭ بٸرٸنە جاتقىزىلعان.
بٸز تەحنولوگييا دامىعان سايىن اقپاراتتى تەز جەتكٸزۋدٸ ٷيرەندٸك. بٸراق ادامنىڭ جٷرەگٸن جارالاماي, دۇرىس جەتكٸزۋدٸ ۇمىتىپ كەتكەن جوقپىز با?
قايعىنى ەشبٸر دەستٷر جەڭٸلدەتە المايدى. بالاسىنان, باۋىرىنان, اعاسىنان ايىرىلعان ادامنىڭ جٷرەگٸندەگٸ اۋىرتپالىقتى ەشقانداي سٶز الىپ تاستامايدى. بٸراق قازاق سول سٶزدٸڭ دە ٶز جاۋاپكەرشٸلٸگٸ بار ەكەنٸن بٸلگەن.
سوندىقتان ەستٸرتۋ — ٶتكەننٸڭ سارقىنشاعى ەمەس. ول — ادامنىڭ جانىن جارالاماي, ەڭ اۋىر شىندىقتى جەتكٸزۋدٸڭ مەدەنيەتٸ.
بەلكٸم, بٷگٸن بٸزگە وسى دەستٷردٸ دەل سول قالپىندا قايتارۋ ەمەس, ونىڭ ەڭ باستى قاعيداسىن — قارالى حاباردى ادامنىڭ جٷرەگٸن ەسكەرە وتىرىپ جەتكٸزۋدٸ قايتا ٷيرەنۋ كەرەك شىعار.
17 ەسكەردٸڭ 14-ٸ قازا تاپتى
24 قىركٷيەكتە ماڭعىستاۋ وبلىسىندا قازاقستان قارۋلى كٷشتەرٸ ەسكەري-تەڭٸز كٷشتەرٸنٸڭ وقۋ-جاتتىعۋى كەزٸندە ەسكەري قىزمەتشٸلەر كاسپيي تەڭٸزٸنە باتىپ كەتتٸ.
رەسمي اقپاراتتا 17 ەسكەري قىزمەتشٸ سۋعا كەتكەنٸ, ونىڭ ٷشەۋٸ قۇتقارىلىپ, 14-ٸ قازا تاپقانى حابارلاندى.
ەلەۋمەتتٸك جەلٸلەردە قازا تاپقان ەسكەري قىزمەتشٸلەردٸڭ تۋعان-تۋىستارىنا قارالى حاباردىڭ جەتكٸزٸلۋ سەتٸ تٷسٸرٸلگەن ۆيدەو تارادى. كادرلاردا مارقۇمداردىڭ جاقىندارى تەمٸر قاقپانىڭ ار جاعىندا تۇرعانى كٶرٸنەدٸ. ال قازا تاپقان ساربازداردىڭ تٸزٸمٸن جاس ەسكەري قىزمەتشٸ وقىپ تۇرعان. قارالى حاباردى ەستٸگەن تۋىستارى جىلاپ, داۋىستاپ, قاقپانى ۇرىپ جاتىر. بۇل كٶرٸنٸس ەلەۋمەتتٸك جەلٸ قولدانۋشىلارىنىڭ نارازىلىعىن تۋعىزىپ, قارالى حاباردى جەتكٸزۋدٸڭ ەدەبٸ مەن تەرتٸبٸنە قاتىستى پٸكٸرتالاسقا سەبەپ بولدى.
وقي وتىرىڭىز: قازاقستاندىقتار قازا تاپقان ساربازداردى قاعازدان وقىپ ەستٸرتكەنگە شاعىمداندى
ايتا كەتەيٸك, 25 قىركٷيەك مەملەكەت باسشىسىنىڭ ٶكٸمٸمەن قازاقستاندا ماڭعىستاۋ وبلىسىندا قىزمەتتٸك مٸندەتٸن اتقارۋ كەزٸندە قازا بولعان ەسكەري قىزمەتشٸلەرگە بايلانىستى جالپىۇلتتىق ازا تۇتۋ كٷنٸ بولىپ جارييالاندى.
