Jyl saiyn Qazaqstanda, 8 naýryz - Áielder kúni qarsańynda, sarapshylardyń túrli málimetteri boiynsha, ondaǵan million dollarǵa gúl satylady.
Degenmen onyń tek 30%-y jergilikti gúlder, qalǵan 70%-y raýshan, baqytgúl men mamyrgúlder shetelden jetkiziledi, dep xabarlaidy QazAqparat.
Negizinen olar Ekvadordan, Niderlandtan, Kolýmbiiadan, Belgiiadan, Reseiden, Qytaidan jáne Ózbekstannan ákelinedi. Buryn naryqtaǵy gúlderdiń basym bóligi Ekvador men Niderland elderinen kelgen bolsa, qazir kásipkerler Túrkiia, Italiia, Resei, Qytai, Izrail men Kolýmbiiadan jetkizýge tyrysady. Biraq Gollandiia gúlderine degen suranys azaiǵan emes.
Aita ketý kerek, Gollandiia aýktsionynda Eýropa, Afrika jáne Latyn Amerikasy elderinde ósirilgen gúlder satylady. Internettiń arqasynda qazir kóptegen tasymaldaýshylar tikelei óndirýshi-memlekettermen kóbirek jumys jasaýdy qolǵa alǵan. Qazaqstan qai elderden gúl satyp alady? Statistika agenttiginiń málimetteri boiynsha, 2016 jylǵy import qurylymyna qaraityn bolsaq, Niderland pen Kolýmbiia gúlderiniń úlesi basym. Ekvadordan keletin gúlderdiń kólemi kúrt tómendegen. Eger 2015 jyly Qazaqstan 924 myń dollarǵa 132 tonna gúl jetkizgen bolsa, 2016 jyly 348,9 myń dollarǵa nebári 36 tonna satyp alǵan. Kórip otyrǵanymyzdai, jetkizý kólemi 4 esege, aqshalai turǵyda 3 esege deiin tómendegen.
Gollandiia - raýshan men qyzǵaldaqtar eli
Naryqta Gollandiiadan kelgen gúlderdiń basym bóligin raýshangúl ielenedi dep esepteledi. Biraq bul jerde kópshiligi qatelesedi. Mamyrgúl - Gollandiiadan Qazaqstanǵa keletin gúlderdiń kóshin bastap otyr. Tek 2015 jyldyń ózinde Qazaqstanǵa 3,4 mln. dollarǵa 549,4 tonna mamyrgúl ákelingen. Al raýshangúldiń nebári 863,9 myń dollarǵa 57,6 tonnasy kelgen. 2016 jyly 3,8 million dollarǵa 652 tonna mamyrgúl, 237,6 myń dollarǵa 42,8 tonna raýshangúl satyp alynǵan. 2016 jyly raýshangúlder negizinen Túrkiiadan jetkizilip jatqandyqtan, onyń kólemi biraz tómendegeni baiqalyp otyr. Byltyr Túrkiiadan 193,7 myń dollarǵa 50,2 tonna raýshangúl ákelingen.
Ózbekstannan 145,6 myń dollarǵa 57 tonna jetkizilipti. 2015 jyly kórshi elden 603,4 myń dollarǵa 123,7 tonna raýshangúl importtalǵan. Al Túrkiiadan 10 myń dollarǵa 100 keli ákelingen.
Mamyrgúlderge qatysty jaǵdai da osyǵan uqsas. 2016 jyly oida joqta osy baǵyttaǵy kóshti Italiia bastady. Bul elden 164,8 tonna mamyrgúl jetkizilip, import kólemi 469,8 myń dollardy quraǵan. Mysaly, 2015 jyly Italiiadan 9,1 myń dollarǵa 4,2 tonna ákelingen. Gollandiialyq gúlderdiń ishinde lalagúldiń de úlesi basym. 2016 jyly ol elden 208,7 myń dollarǵa 29,6 tonna lalagúl importtalǵan. 2015 jyly 286,1 myń dollarǵa 40,9 tonna lalagúl jetkizildi.
Qazaqstandyq er azamattar 8 naýryzda óz súiiktilerine qandai gúlderdi syilaǵandy jón kóredi?
Qazaqstanda gúlderdi satyp alatyn negizinen Astana men Almaty qalalarynyń turǵyndary, olarǵa satylymnyń 70-80% tiesili. Qazaqstandyq er azamattar gúlge kelgende aqsha aiamaidy. Túrli derekter boiynsha, 8 naýryz qarsańynda erler on myńdaǵan dollarǵa satyp alýǵa daiyn. 101 dana raýshangúlge degen suranys áli báseńsimegen, deidi Astanadaǵy kásipker, gúl biznesinde 5 jyldyq tájiribesi bar Rýslan Salyqov. Degenmen gúl syilaýdyń ózge de túrleri shyqqan.
"Eger buryn erler 101 dana raýshangúl satyp alýdy jón kórse, qazir ishi qymbat gúlmen toltyrylǵan Mersedes-221 kóligimen kelý sánge ainaldy. Bir qyzyǵy, salon ishinde de 221 raýshangúl bolady. Bul "berekeniń" simvoly ispettes. Biraq buny tek bai adamdar isteidi. Negizinen qarapaiym azamattar buǵan kóp aqsha shyǵyndamaýdy jón kóredi", - dedi Salyqov QazAqparat tilshisine bergen suxbatynda.
Onyń sózinshe, buryn qazaqstandyqtar raýshangúlge kóp tańdaý jasasa, sońǵy jyldary orxideia men gollandiialyq qyzǵaldaqtardy kóp satyp alýda.
"Birneshe jyl buryn ǵashyqtardyń biri óz súiiktisine 1 million dana qyzyl raýshan syilaǵany týraly gazet-jýrnaldar jazǵany esterińizde bolar. Naqty Astanada nemese Almatyda ol týraly estimedim. Biraq bizde eń kóbi 1001 raýshangúl syilaǵan er azamattar boldy. Ol eń qymbat raýshangúlderdi syilap, ǵashyǵyna sóz salǵan edi", - deidi kásipker.
