Foto: instagram.com/de_lacure
Almaty politsiiasy qazaqstandyq reper Ánýar Baimuhaevtyń (De Lacure) YouTube-shoýda aitqan daýly málimdemesine qatysty tekserý júrgizip jatyr. Bul týraly Almaty Politsiia departamentiniń resmi ókili Saltanat Ázirbek málimdedi, dep habarlaidy Ult.kz.
Áleýmettik jelilerde taraǵan «Mne stydno» atty áli jaryqqa shyqpaǵan shoý úzindilerinen keiin qoǵam ókilderi aitylǵan oqiǵaǵa quqyqtyq baǵa berýdi talap etken.
Atalǵan baǵdarlama — komikter men blogerler qatysatyn oiyn-saýyq jobasy. Onda qatysýshylar jeke ómirindegi yńǵaisyz nemese “uiat” jaǵdailarymen bólisedi.
Taraǵan beinejazbada reperdiń aitýynsha, ol dostarymen birge kóshede kele jatyp, kómek suraǵan áieldi tapqan. Keiin ol jerde bolǵan oqiǵaǵa bailanysty kúmándi jaittar baiandalǵan. Bul áńgime kópshilik arasynda rezonans týdyrdy.
Politsiia bul derekterge bailanysty tekserý bastalǵanyn habarlady. Degenmen vedomstvo mundai jaǵdailarda keide aqparattyń haip úshin burmalanýy múmkin ekenin de joqqa shyǵarmai otyr.
“Eger derekter rastalsa, mindetti túrde quqyqtyq baǵa beriledi. Biraq tájiribede keide tanymal bolý úshin jalǵan aqparat taratý jaǵdailary da kezdesedi,” – dedi Saltanat Ázirbek.
Sonymen qatar, ol aqparat rastalǵan jaǵdaida kináliler zań aldynda jaýap beretinin atap ótti. Al reperdiń áreketsizdigine qatysty jaýapkershilik máselesi ázirge qarastyrylý satysynda.
