Atyraýda 13 jyl birge turǵan áielin 12 jasar qyzynyń kózinshe óltirgen 63 jastaǵy zeinetker 15 jylǵa bas bostandyǵynan aiyryldy, dep habarlaidy ult.kz.
Kazinform tilshisiniń habarlaýynsha, Atyraý oblysynyń qylmystyq ister jónindegi mamandandyrylǵan aýdanaralyq soty ony Qylmystyq kodekstiń 99-baby 2-bóligi 5-tarmaǵy («Asa qatygezdikpen adam óltirý») boiynsha kináli dep tanydy. Sot úkimimen ol jazasyn qaýipsizdigi ortasha qylmystyq-atqarý júiesi mekemesinde óteidi. Sondai-aq sottalýshy marqumnyń týysyna 5 million teńge kóleminde moraldyq ótemaqy tóleýge mindetteldi.
Qandy oqiǵa biyl 16 naýryzǵa qaraǵan túni bolǵan. Tergeý materialdaryna sáikes, er adam qyzynyń janynda uiyqtap jatqan áieline pyshaqpen 11 ret soqqy jasaǵan. Oqiǵa kezinde 12 jastaǵy qyzy ákesinen politsiia men jedel járdem shaqyrýdy ótingen.
Sot barysynda sottalýshynyń qylmysqa aldyn ala daiyndalǵany anyqtaldy. Ol úidegi beinebaqylaý kameralaryn aldyn ala óshirip tastaǵan.
Kórshileriniń aitýynsha, marqum kózi tirisinde kúieýinen qaýiptenetinin, bir kúni onyń qolynan qaza tabýy múmkin ekenin aityp júrgen. Tergeý málimetinshe, er adam áielin negizsiz qyzǵanyp, sonyń saldarynan qylmysqa barǵan.
Sot protsesi kezinde aiyptalýshy óz kinásin tolyq moiyndap, marqumnyń týystarynan keshirim surady.
Qaza bolǵan 58 jastaǵy áiel Atyraý qalasyndaǵy mektepterdiń birinde bastaýysh synyp muǵalimi bolyp jumys istegen. Ol uzaq jyldar bilim berý salasynda eńbek etip, mektep direktorynyń orynbasary qyzmetin de atqarǵan.
