Qyrǵyzstan prezidenti Almazbek Atambaev qazaq-qyrǵyz shekarasyndaǵy jaǵdaidyń durystalatynyna senimdi ekenin málimdedi. Onyń sózinshe, Resei Federatsiiasy Qyrǵyzstan men Qazaqstan arasyndaǵy qarym-qatynasty retteýge kómektesýi kerek.
Osy haqynda jáne ózge de jaǵdailarǵa qatysty pikirlerin ol eldi basqarǵanyna alty jyl tolýyna orai ótken baspasóz konferentsiiasy barysynda aitty, - dep jazady "Ult aqparat".
"Ózderińiz biletin bolarsyzdar, jaqynda men Resei prezidenti, jaqyn dosym Vladimir Vladimirovich Pýtinmen kezdestim. Oǵan ashyq túrde "sizderge Eýraziialyq ekonomikalyq odaq kerek bolsa, ony buzyp jatqandardyń isine aralaspai osylai otyra berýge bolmaidy" dep aittym. Qazaqstanmen bailanys durystalady. Bul Astana úshin de, birinshi rette Resei úshin de kerek. Men durys istedim dep oilaimyn. Bizdiń ishki isimizge aralasýǵa bolmaitynyn eskerttik. Qazir óz elińnen góri, ózge eldegi jaǵdaidy shaiqaltý ońaiyraq bolyp tur", - dedi Qyrǵyzstan prezidenti eki el arasyndaǵy yntymaqtastyqty retteý týraly suraqtarǵa jaýap bere otyryp.
Aita keteiik, osyǵan deiin Almazbek Atambaev Qazaqstan biligin prezident sailaýyna aralasyp jatyr dep aiyptaǵan bolatyn. Soǵan bailanysty Qazaqstan Qyrǵyzstanmen shekarada qaýipsizdik sharalaryn kúsheitken edi. Nátijesinde shekaradan ótetin azamattardyń sany 2,5 esege qysqarǵan edi.
Biraq 10 qarashada Qyrǵyzstan biligi Qazaqstan tarapy júk baqylaýynda kóp shara qoldanyp jatqany týraly málimdedi. Óz kezeginde Qazaqstan premeri Baqytjan Saǵyntaev Qyrǵyzstanmen shekaradaǵy qatań baqylaýdyń Bishkekke qarsy emes, kerisinshe, kontrabanda kólemin qysqartýǵa baǵyttalǵanyn málimdedi. Al, Bishkek tarapy Qazaqstan shekarada "qoldan kedergi jasap otyrǵanyn" aityp, Dúniejúzilik saýda uiymyna jáne Eýraziia ekonomikalyq odaǵyna (EAEO) júgingen.
Esterińizge sala keteiik, Almazbek Atambaev Qyrǵyzstan prezidenti qyzmetine 2011 jyldyń 1 jeltoqsanynda kirisken. Al, biylǵy jyldyń 15 qazanynda ótken sailaýda jeńiske jetken Sooronbai Jeenbekovti ulyqtaý sharasy 24 qarashada ótedi.
