28-29 qazanda Astanada «Ortalyq Aziiadaǵy meditsinalyq bilim berýdi transformatsiialaý: bolashaq densaýlyq saqtaý júieleri úshin bilim berýdegi úzdik tájiribe jáne tsifrlyq quzyretter» atty konferentsiia ótip jatyr, dep habarlaidy ult.kz.
Is-sharaǵa qatysýshylardyń qatarynda Ortalyq Aziia elderiniń densaýlyq saqtaý ministrlikteriniń ókilderi, ýniversitetter, halyqaralyq deńgeide tanylǵan ǵalymdar, ǵylymi zertteýshiler, sondai-aq bilim berý sapasyn baǵalaý jáne akkreditteý uiymdarynyń mamandary bar.
Nazarbayev University Meditsina mektebiniń oqytýshysy Eltai Rahmanovtyń aitýynsha konferentsiiada meditsinalyq bilim berýdegi innovatsiialyq tehnologiialardy, sonyń ishinde jasandy intellektini qoldaný, ony bilim berý júiesine engizýdiń negizgi qaǵidattary jáne halyqaralyq standarttarǵa sai bilim berý baǵdarlamalaryn júzege asyrý máseleleri talqylanady. Sonymen qatar óńirde jumys isteitin dárigerlerdi, kinezioterapevter men ergoterapevterdi biriktiretin kásibi uiymdardyń ókilderi de qatysyp otyr.
«Sondyqtan bul konferentsiianyń mańyzy zor. Ol Ortalyq Aziiadaǵy meditsinalyq bilim berý salasynyń barlyq negizgi múddeli taraptaryn bir alańǵa jinap, tájiribe almasýǵa jáne óńirdegi bilim berý sapasyn arttyrýǵa múmkindik beredi», – deidi Eltai Rahmanov.
Nazarbayev University Meditsina mektebiniń oqytýshysy Gúljanat Aimaǵambetovanyń sózinshe sońǵy 30 jyl ishinde meditsinalyq bilim berý salasy úlken joldan ótti. KSRO ydyraǵannan keiin barlyq elderdiń bilim berý qurylymy birdei bolǵanymen, qazir árqaisysy óz salasynda jeke damyp jatyr.
«Qazaqstan, Qyrǵyzstan, Tájikstan, Ózbekstan siiaqty Ortalyq Aziia elderiniń konteksti uqsas bolǵandyqtan, osy óńirdiń basshylary men jetekshilerin jinap, ortaq tájiribe almasýdy kózdeimiz», – deidi ol.
Ol bolashaqta sharany basqa da Ortalyq Aziia elderinde ótkizý nieti bar ekenin jetkizdi.
Mamandar meditsina men meditsinalyq bilim berý jańa tehnologiialardyń, sonyń ishinde jasandy intellekttiń áserinen qatty ózgerip jatqanyn alǵa tartyp otyr.
«Sondyqtan oqytý ádisterin zaman talabyna sai ózgertip, dárigerlerge jańa tehnologiialardy durys qoldanýdy úiretý mańyzdy», – deidi Gúljanat Aimaǵambetova.
Konferentsiiaǵa dúniejúzilik deńgeidegi jetekshi ýniversitetter – mysaly, Maastriht ýniversiteti men halyqaralyq sertifikatsiialyq agenttikterdiń – UK Advance HE ókilderi shaqyrylǵan. Bul uiymdar oqytýshylardy qalai oqytý kerektigin zerttep, standarttaý jumystaryn júrgizedi.
Niderlanddaǵy Maastriht ýniversiteti professory Erik Drissenniń pikirinshe, muǵalimder stýdentterge jasandy intellekt usynǵan aqparatty syni turǵydan baǵalaýdy úiretýi kerek. Ol úshin stýdentterdiń berik bilim bazasy bolýy mańyzdy.
«Keide jasandy intellekt dáýirinde bilimniń mańyzy tómendedi degen pikir aitylýy múmkin. Alaida klinikalyq paiym jasaý, máselelerdi sheshý jáne jasandy intellekt usynǵan tujyrymdar men dálelderdiń durystyǵyn baǵalaý úshin tereń bilim qajet», – dep otyr professor Drissen.
Sonymen qatar ol klinikalyq tájiribeden alatyn paidany arttyrý mańyzdy ekenin de aityp ótti. Onyń sózinshe, stýdentter aýrýhanalarda nemese ambýlatoriialyq jaǵdaida tájiribeden ótken kezde, patsienttermen jumys istegennen keiingi taldaý men keri bailanysty talqylaý olardyń bilimin tereńdetýge kómektesedi.
«Úshinshiden, stýdentterdi bolashaq mamandyǵyna baǵyttap, kásibi qalyptasýyna qoldaý kórsetý qajet. Bul rette oqytýshylardyń róli erekshe. Dáriger árdaiym barlyq suraqtyń jaýabyn bile bermeidi. Sondyqtan óz biliminiń shegin túsiný, klinikalyq jaǵdaidy durys baǵalaý jáne qajet bolǵan jaǵdaida basqa áriptesterden nemese mamandardan kómek surai bilý de — mańyzdy kásibi daǵdylardyń biri», – dedi ol.
Gonkong Qytai ýniversiteti professory Vai-Tat Vong jýrnalisterge bergen suqbatynda Gonkong, Aziia jáne Ortalyq Aziia elderiniń meditsina salasyndaǵy bilim berý júieleri uqsas máselelerge tap bolyp otyrǵanyn jetkizdi. Onyń aitýynsha, qazirgi meditsina stýdentteriniń oqý tásiline tehnologiialar, ásirese jasandy intellekt aitarlyqtai áser etýde. Sondyqtan stýdentterge jasandy intellektti meditsinalyq tájiribede qalai qoldaný kerektigin úiretýmen qatar, ony bilim berý úderisinde de tiimdi paidalaný mańyzdy.
«Bul meditsina mektepteri men klinikalyq oqytýshylar úshin úlken mindet. Ásirese Aziia elderinde ekonomikalyq damý deńgeii men mádeni erekshelikterdiń ártúrliligi meditsinalyq bilim berýdiń biryńǵai tásilderin qoldanýdy qiyndatady. Sondyqtan halyqaralyq tájiribeni jergilikti jaǵdailarǵa beiimdep, bolashaqta meditsinalyq bilim berýdi jetildirýdiń tiimdi joldaryn qarastyrý qajet», – dedi Vai-Tat Vong.
Professor Nazarbayev University-de ótip jatqan konferentsiiadaǵy baiandamasynda jasandy intellekt pen virtýaldy shynaiylyq (VR) siiaqty tehnologiialardy qoldanýdaǵy sońǵy jetistiktermen bólisti. Sondai-aq elektrondy oqytý platformasyna negizdelgen «aýystyrylǵan synyp» (flipped classroom) formatyn jetildirý joldaryn qarastyratynyn aitty.
«Al baǵalaý júiesinde tehnologiialardy qoldaný tájiribemiz ázirge shekteýli. Sondyqtan Qazaqstannyń jáne basqa elderdiń meditsina mektepterindegi tájiribelerimen tanysyp, bilim alýshylardyń bilimin baǵalaý úderisinde tehnologiialardy tiimdi paidalanýdyń jańa tásilderin úirenýge úmittimin», – dedi professor.
Konferentsiia barysynda qatysýshylar oqytýshylardyń kásibi-pedagogikalyq áleýetin arttyrýǵa, bilim berý úderisine jasandy intellekt tehnologiialaryn engizýge, inkliýzivti oqytý tájiribelerin damytýǵa jáne halyqaralyq yntymaqtastyqty keńeitýge baǵyttalǵan tájiribege baǵdarlanǵan interaktivti sheberlik synyptaryna qatysady. Árbir sheberlik synybynyń qorytyndysy retinde atysýshylar meditsinalyq bilim berýdi institýtsionaldyq jáne óńirlik deńgeide damytý men jańǵyrtýǵa baǵyttalǵan naqty praktikalyq sheshimder men olardy iske asyrýdyń is-qimyl josparyn birlesip ázirleidi.
