Qazaqstanda qysqy dóńgelekke suranys artqan tusta internet-alaiaqtar da belsendi bola bastaǵan. Olar shinalardy naryqtaǵy baǵadan áldeqaida arzan usynyp, aldyn ala tólem talap etedi. Bul týraly Ishki ister ministrligi eskertti, dep habarlaidy ult.kz.
IIM málimetinshe, alaiaqtar áleýmettik jeliler men internet-platformalarda jalǵan habarlandyrý jariialap, satyp alýshylardan taýardy brondaý úshin aqsha aýdarýdy suraidy. Keide suranystyń joǵary ekenin aityp, shinanyń tolyq qunyn tóleýdi talap etedi.
Aqshany alǵan soń olar satyp alýshylardy buǵattap, habarlandyrýlaryn óshirip, bailanysqa shyqpai qoiady. Nátijesinde azamattar aqshasynan aiyrylyp, taýarsyz qalady.
IIM mynadai saqtyq sharalaryn usynady:
- Taýardy teksermei turyp, beitanys satýshyǵa aldyn ala tólem jasamaý;
- Naryqtaǵy baǵadan tym arzan usynystarǵa kúmánmen qaraý;
- Qysqy dóńgelekti resmi dúkenderden nemese senimdi satýshylardan alý;
- Tólem jasamas buryn taýardyń bar-joǵyn jáne jaǵdaiyn tekserý;
- Kúmándi siltemelerge ótpeý, bank derekteri men SMS-kodtardy bógde adamdarǵa bermeý.
IIM eskertýinshe, baǵanyń tym tómen bolýy jáne satýshynyń tólemdi asyqtyrýy alaiaqtyq belgisi bolýy múmkin. Alaiaqtyqqa tap bolǵan jaǵdaida 102 nómirine habarlasý qajet.
