Tanymal aktrisa Dariǵa Badyqovanyń burynǵy kúieýi, akter Darhan Musaev jeke ómirindegi qýanyshty jańalyǵyn jariialady. Óner iesi súiiktisimen zańdy nekege turǵanyn málimdedi, dep habarlaidy ult.kz.
Akter bul jańalyǵyn áleýmettik jelidegi paraqshasynda bólisip, oqyrmandarynan súiinshi surady. Ol ómirinde jańa kezeń bastalǵanyn aityp, otbasyn qurǵanyn jetkizdi.
"Búgin sizdermen ekinshi jańalyǵymmen bólissem dep otyrmyn. Árine, jalǵyzdyq Qudaiǵa ǵana jarasqan. Búgin men, búgin biz nekege otyrdyq. Al, súiinshi, quttyqtap qoisańyzdar bolady", – dedi Darhan Musaev.
Óner iesiniń bul málimdemesi jeli qoldanýshylarynyń nazaryn aýdardy. Oqyrmandar akterdi jańa ómirimen quttyqtap, jas otbasyna baqyt pen bereke tiledi.
Aita keteiik, Darhan Musaev buǵan deiin de jeke ómirindegi ózgerister týraly aityp, kópshilikke jańa súiiktisin tanystyrǵan. Endi akter ekeýiniń qarym-qatynasy resmi nekege ulasqanyn habarlady.
"16 jyl birge turdyq": Darhan Musaev ajyrasýy týraly ne aitqan?
Eske salaiyq, Darhan Musaev buǵan deiin tanymal aktrisa Dariǵa Badyqovamen 16 jyl otbasyly bolǵan. Olardyń ajyrasýy 2025 jyldyń qazan aiynda kópshiliktiń qyzý talqysyna tústi. Sol kezde akter jýrnalist Nurseiit Jylqyshybaidyń "Ýaqyt kórsetedi" baǵdarlamasyna qatysyp, burynǵy nekesi týraly ashyq áńgimelegen. Suhbat barysynda ol otbasylyq ómirde jibergen qatelikterin eske alyp, keibir sheshimderine ókinetinin jasyrmady. Ásirese burynǵy jubaiynyń kóńiline qarap, týǵan-týystarymen aralasýy siregenin aitqan.
"Ómirdiń ózi ókinishten turady. Ókinemin. Qatty ókinemin", – dedi akter suhbatynda.
Alaida Dariǵa Badyqova burynǵy kúieýiniń málimdemelerimen kelispei, áleýmettik jelide óz ustanymyn bildirdi. Aktrisa nekeleri kezinde baqytty ómir súrmegenin aityp, ajyrasýǵa birneshe jaǵdai sebep bolǵanyn jetkizdi. Keiin ol atalǵan suhbatqa bailanysty sotqa júgindi, alaida 2026 jylǵy aqpanda sot onyń talaptaryn qanaǵattandyrmady.
Al Darhan Musaev 2026 jylǵy qazanda "Ne deidi?" baǵdarlamasyna bergen suhbatynda ajyrasýdan keiingi syn-pikirler men ótken ómirindegi kóńilinde qalǵan jaǵdailar týraly taǵy da áńgimeledi.
