26-27 maýsym kúnderi elordadaǵy «Astana Balet» teatry sahnasynda «Altyn gúl» baletiniń premerasy ótedi. Jańa qoiylym teatrdyń shyǵarmashylyq maýsymyn qorytyndylaityn mańyzdy mádeni oqiǵa bolmaq, dep habarlaidy ult.kz.
Balettiń ideiasy bizdiń dáýirimizge deiingi III-II ǵasyrlarǵa jatatyn Teńlik qorǵandarynan tabylǵan qyzǵaldaq beinesi bederlengen altyn plastina negizinde dúniege kelgen. Qoiylymnyń librettosyn aqyn, Qazaqstannyń eńbek sińirgen qairatkeri Baqyt Qaiyrbekov jazǵan.
Spektaklde adam men tabiǵat arasyndaǵy úilesim, urpaqtar sabaqtastyǵy jáne ulttyq qundylyqtarǵa adaldyq taqyryptary kórkem tilmen órnekteledi. Oqiǵa jelisi dala qyzǵaldaǵynyń sulýlyǵynan shabyt alǵan zergerdiń taǵdyry tóńireginde órbidi. Keiipker ómiri arqyly týǵan jerge súiispenshilik, ata-baba murasyn qasterleý jáne dástúr jalǵastyǵy ideialary kórinis tabady.
Balet mýzykasynyń avtory – Qazaqstannyń eńbek sińirgen qairatkeri Renat Ǵaisin. Qoiýshy-horeograf retinde Qazaqstannyń eńbek sińirgen qairatkeri, teatrdyń bas baletmeisteri Muqaram Ábýbahrieva eńbek etken. Al spektakl keiipkerleriniń sahnalyq beinesin sýretshi Áigerim Altybasarova ázirlegen kostiýmder tolyqtyra túsedi.
«Altyn gúl» qoiylymynda klassikalyq balet, neoklassika jáne zamanaýi bi elementteri úilesim taýyp, kórermenge erekshe sahnalyq sheshim usynady. Spektakl teatrdyń bas dirijeri Arman Orazǵalievtiń jetekshiligimen ótedi.
Teatr ujymy jańa týyndy arqyly qazaq halqynyń tarihi murasy men mádeni qundylyqtaryn zamanaýi óner tilimen tanystyrýdy maqsat etip otyr.
