Qazaqstan Respýblikasy Parlamenti Májilisindegi «Aq jol» demokratiialyq partiiasynyń fraktsiiasy Premer-Ministrdiń orynbasary – Jasandy intellekt jáne tsifrlyq damý ministri J.H. Mádievke depýtattyq saýal joldady, dep habarlaidy ult.kz.
Depýtattar mobildi bailanys naryǵynda azamattardyń quqyqtaryna qatysty birqatar ózekti máselelerdi kóterdi. Atap aitqanda, Kcell/Activ jáne ózge de operatorlarǵa qatysty abonentterden túsetin shaǵymdar sanynyń artyp otyrǵany aityldy.
Májilis depýtattarynyń málimetinshe, keibir paidalanýshylardyń kelisiminsiz «Fun Online», «My Games», «Cinema Games», «New Happy Bonus» siiaqty aqyly servister avtomatty túrde qosylyp, abonent shotynan turaqty túrde qarajat sheship otyrǵan jaǵdailar kezdesedi.
Sonymen qatar, abonentterge birneshe servistiń qatar qosylýy, al jazylymdar týraly habarlamalardyń ýaqytyly jetpeýi nemese nazardan tys qalýy saldarynan azamattardyń qarajaty uzaq ýaqyt boiy sebepsiz azaiyp otyrǵany kórsetildi.
Beeline Kazakhstan abonentterine qatysty da másele kóterildi. Depýtattardyń aitýynsha, tarifti tóleýge jetkilikti qarajat bolmaǵan jaǵdaida qyzmetti ýaqytsha toqtatý ornyna abonent avtomatty túrde qymbat bazalyq tarifke aýystyrylady. Bul birneshe saǵat ishinde balanstyń tez taýsylýyna ákelýi múmkin.
Depýtattar mundai tájiribeni ádiletsiz dep baǵalap, paidalanýshyǵa tek jetpegen somany tolyqtyrý múmkindigin berý, al tarif sharttaryn ózgertý tek abonenttiń naqty kelisimimen júzege asýy tiis ekenin usyndy.
Sondai-aq, bailanys operatorlary qoldanatyn «avanstyq toltyrý» júiesi de synǵa alyndy. Depýtattardyń esepteýinshe, 20%-ǵa deiin jetetin komissiia qysqa merzimdi qarjylyq operatsiiany joǵary paiyzdyq mólsherlemege teńestirip, tutynýshylarǵa qosymsha júkteme túsiredi.
Fraktsiia ókilderi mobildi qosymshalar men jeke kabinetterde barlyq aqyly qyzmetter, jazylymdar jáne esepten shyǵýlar týraly tolyq aqparattyń ashyq kórsetilýin talap etti. Sonymen qatar, paidalanylmaǵan internet-trafiktiń bir bóligin kelesi aiǵa aýystyrý tetigin engizý usynyldy.
«Aq jol» fraktsiiasy atalǵan máseleler boiynsha keshendi tekserý júrgizip, mobildi bailanys naryǵyndaǵy tarifteý men qyzmet kórsetý tájiribesin qaita qaraýdy usyndy.
