قازاقستان رەسپۋبليكاسى پارلامەنتٸ مەجٸلٸسٸندەگٸ «اق جول» دەموكراتييالىق پارتيياسىنىڭ فراكتسيياسى پرەمەر-مينيستردٸڭ ورىنباسارى – جاساندى ينتەللەكت جەنە تسيفرلىق دامۋ مينيسترٸ ج.ح. مەديeۆكە دەپۋتاتتىق ساۋال جولدادى, دەپ حابارلايدى ult.kz.
دەپۋتاتتار موبيلدٸ بايلانىس نارىعىندا ازاماتتاردىڭ قۇقىقتارىنا قاتىستى بٸرقاتار ٶزەكتٸ مەسەلەلەردٸ كٶتەردٸ. اتاپ ايتقاندا, Kcell/Activ جەنە ٶزگە دە وپەراتورلارعا قاتىستى ابونەنتتەردەن تٷسەتٸن شاعىمدار سانىنىڭ ارتىپ وتىرعانى ايتىلدى.
مەجٸلٸس دەپۋتاتتارىنىڭ مەلٸمەتٸنشە, كەيبٸر پايدالانۋشىلاردىڭ كەلٸسٸمٸنسٸز «Fun Online», «My Games», «Cinema Games», «New Happy Bonus» سيياقتى اقىلى سەرۆيستەر اۆتوماتتى تٷردە قوسىلىپ, ابونەنت شوتىنان تۇراقتى تٷردە قاراجات شەشٸپ وتىرعان جاعدايلار كەزدەسەدٸ.
سونىمەن قاتار, ابونەنتتەرگە بٸرنەشە سەرۆيستٸڭ قاتار قوسىلۋى, ال جازىلىمدار تۋرالى حابارلامالاردىڭ ۋاقىتىلى جەتپەۋٸ نەمەسە نازاردان تىس قالۋى سالدارىنان ازاماتتاردىڭ قاراجاتى ۇزاق ۋاقىت بويى سەبەپسٸز ازايىپ وتىرعانى كٶرسەتٸلدٸ.
Beeline Kazakhstan ابونەنتتەرٸنە قاتىستى دا مەسەلە كٶتەرٸلدٸ. دەپۋتاتتاردىڭ ايتۋىنشا, تاريفتٸ تٶلەۋگە جەتكٸلٸكتٸ قاراجات بولماعان جاعدايدا قىزمەتتٸ ۋاقىتشا توقتاتۋ ورنىنا ابونەنت اۆتوماتتى تٷردە قىمبات بازالىق تاريفكە اۋىستىرىلادى. بۇل بٸرنەشە ساعات ٸشٸندە بالانستىڭ تەز تاۋسىلۋىنا ەكەلۋٸ مٷمكٸن.
دەپۋتاتتار مۇنداي تەجٸريبەنٸ ەدٸلەتسٸز دەپ باعالاپ, پايدالانۋشىعا تەك جەتپەگەن سومانى تولىقتىرۋ مٷمكٸندٸگٸن بەرۋ, ال تاريف شارتتارىن ٶزگەرتۋ تەك ابونەنتتٸڭ ناقتى كەلٸسٸمٸمەن جٷزەگە اسۋى تيٸس ەكەنٸن ۇسىندى.
سونداي-اق, بايلانىس وپەراتورلارى قولداناتىن «اۆانستىق تولتىرۋ» جٷيەسٸ دە سىنعا الىندى. دەپۋتاتتاردىڭ ەسەپتەۋٸنشە, 20%-عا دەيٸن جەتەتٸن كوميسسييا قىسقا مەرزٸمدٸ قارجىلىق وپەراتسييانى جوعارى پايىزدىق مٶلشەرلەمەگە تەڭەستٸرٸپ, تۇتىنۋشىلارعا قوسىمشا جٷكتەمە تٷسٸرەدٸ.
فراكتسييا ٶكٸلدەرٸ موبيلدٸ قوسىمشالار مەن جەكە كابينەتتەردە بارلىق اقىلى قىزمەتتەر, جازىلىمدار جەنە ەسەپتەن شىعۋلار تۋرالى تولىق اقپاراتتىڭ اشىق كٶرسەتٸلۋٸن تالاپ ەتتٸ. سونىمەن قاتار, پايدالانىلماعان ينتەرنەت-ترافيكتٸڭ بٸر بٶلٸگٸن كەلەسٸ ايعا اۋىستىرۋ تەتٸگٸن ەنگٸزۋ ۇسىنىلدى.
«اق جول» فراكتسيياسى اتالعان مەسەلەلەر بويىنشا كەشەندٸ تەكسەرۋ جٷرگٸزٸپ, موبيلدٸ بايلانىس نارىعىنداعى تاريفتەۋ مەن قىزمەت كٶرسەتۋ تەجٸريبەسٸن قايتا قاراۋدى ۇسىندى.
