Foto: Pinterest
Ult.kz-te jihankez jýrnalist Dinara Bolattyń ózge paiymy.
Qoǵamda bala súiý — baqyt, al ana bolý — qasiet dep esepteledi. Árine bul oidyń túbinde ǵasyrlar boiy qalyptasqan ulttyq, dini senimder jatyr. Qazaq «Jumaq ananyń tabanynyń astynda», «anańnyń eńbegin ony Mekkege arqalap aparsań da ótei almaisyń» deidi. Bul sóz adamzat ómirinde ana roliniń orny erekshe ekenin kórsetedi. Biraq osy kózqaras shynaiy ómirmen qanshalyqty úilesedi?
Kóp jaǵdaida «Ana – qasietti» degen uǵym ony qoǵamnyń jáne otbasynyń aldynda óz arman-qalaýynan bas tartýǵa ákeledi. «Bala úshin bárine shydaý kerek», «analyq paryz» dep, ózin qurban etip júrgen analar barshylyq. Bul óz kezeginde ananyń tulǵa retinde ózin joǵaltýyna ákeledi. Arty ókinish, eseigen baladan kútý, qurban etken jyldardyń ótemin baladan talap etý.
«Qasietti» degen uǵym birden esh qatelespeitin minsiz beineni elestetedi. Al biz bilsek bárimiz pendemiz ǵoi, perishte kókte ǵana. Ana degen kim? Ol da – et pen súiekten jaratylǵan, sezimi bar, kúizeliske túsetin, qatelesetin adam. Onyń da balalyq shaǵy, óz jaraqaty bolǵan, múmkin áli de bar. Ol da ómir boiy úirenip keledi. Ásirese alǵashqy balasyn dúniege ákelgende, ózi de jańa ómirge endi qadam basqandai kúi keshedi. Júktilik, ýaiym, kútiný, bosaný, uiqysyz túnder, densaýlyq máseleleri, júktilikten keiingi depressiia, bala asyraý, tárbieleý munyń bári ana bolý jolynyń kúrdeli kezeńderi. Ol joldyń tutas minsiz bolýy ekitalai.
Anany tek uly, meiirimdi, árqashan tózimdi etip kórsetý onyń jeke tulǵa retindegi bolmysyn elemeý degen sóz. Ana keide ashýlanady, jylaidy, sharshaidy, keide balaǵa daýys, qol kóterýi de múmkin. Ár ana bul roldi qolynan kelgenshe alyp shyǵady. Bul sógý, synaý emes, bul ana rolin túsiný, qalai bar solai qabyldaý.
Paiym
Ana uǵymyn qasietti dep óleń, sózben ásireleý artyq. Balaly bolý – ońai, ana bolý – qiyn. Ár ana bul roldi qolynan kelgenshe alyp shyǵady. Iá, ana joly – úlken eńbek, tutas ǵumyr. Sol sebepti «qasietti» dep analarǵa jan-jaqty júk artyp qoimai, olarǵa er azamatynan, ata-ana, ata-enesinen, qoǵamnan jan-jaqty qoldaý qajet. Sebebi qazirgi zamanda ol tek ana rolimen shektelmeitin ámbebap jan. Anaǵa demalý quqyǵy, qatelesý quqyǵy, ózimen ózi bolý erkindigi aýadai qajet.
Dinara Bolat
.jpg)
