Qazaqstan, Túrkiia jáne Grýziianyń quqyq qorǵaý organdary birlesken arnaiy operatsiia júrgizip, transulttyq uiymdasqan qylmystyq toptyń qyzmetine tosqaýyl qoidy, dep habarlaidy ult.kz.
Ishki ister ministrliginiń málimetinshe, tergeý ótken jyly Ystanbulda Qazaqstan azamatynyń oqqa ushýynan keiin bastalǵan. Qazaqstan, Túrkiia jáne Grýziia politseileriniń birlesken jumysynyń nátijesinde qylmysqa qatysy bar eki adam ustalyp, keiin kisi óltirýdi uiymdastyrýshy men tapsyrys berýshi anyqtalǵan.
IIM Uiymdasqan qylmysqa qarsy kúres departamentiniń ókili Qýandyq Alpystyń aitýynsha, tergeý barysynda alynǵan aqparat Ulttyq qaýipsizdik komitetimen birlesip, osy qylmystyq toptyń Qazaqstan aýmaǵynda jasaǵan ózge de aýyr qylmystaryn ashýǵa múmkindik bergen.
Atap aitqanda, 2025 jylǵy tamyzda Almatyda qala turǵynyn óltirýge oqtalǵan qylmystyq toptyń killerleriniń biri ustalǵan. Bul is boiynsha tergeý aiaqtalyp, materialdar sotqa joldanǵan.
Sonymen qatar Qazaqstan, Túrkiia jáne Grýziia aýmaǵynda kezeń-kezeńimen júrgizilgen arnaiy operatsiia barysynda Almatyda atalǵan qylmystyq qurylymnyń birneshe múshesi qolǵa tústi. Tergeý málimetinshe, olar qarý qoldanylǵan birneshe shabýylǵa qatysy bar degen kúdikke ilingen.
Sondai-aq Grýziiada da transulttyq qylmystyq qurylymmen bailanysy bar jáne birneshe aýyr qylmysqa qatysy bolýy múmkin kúdiktiler ustaldy.
Qazir quqyq qorǵaý organdary belgili bolǵan barlyq qylmystyq derekter boiynsha dáleldemeler jinap, iske qatysy bar ózge tulǵalardy anyqtap jatyr. Sonymen qatar toptyń uiymdastyrýshysyn qoldanystaǵy zańnamaǵa sáikes jaýapkershilikke tartý baǵytyndaǵy jumystar jalǵasýda.
