قازاقستان, تٷركييا جەنە گرۋزييانىڭ قۇقىق قورعاۋ ورگاندارى بٸرلەسكەن ارنايى وپەراتسييا جٷرگٸزٸپ, ترانسۇلتتىق ۇيىمداسقان قىلمىستىق توپتىڭ قىزمەتٸنە توسقاۋىل قويدى, دەپ حابارلايدى ult.kz.
ٸشكٸ ٸستەر مينيسترلٸگٸنٸڭ مەلٸمەتٸنشە, تەرگەۋ ٶتكەن جىلى ىستانبۇلدا قازاقستان ازاماتىنىڭ وققا ۇشۋىنان كەيٸن باستالعان. قازاقستان, تٷركييا جەنە گرۋزييا پوليتسەيلەرٸنٸڭ بٸرلەسكەن جۇمىسىنىڭ نەتيجەسٸندە قىلمىسقا قاتىسى بار ەكٸ ادام ۇستالىپ, كەيٸن كٸسٸ ٶلتٸرۋدٸ ۇيىمداستىرۋشى مەن تاپسىرىس بەرۋشٸ انىقتالعان.
ٸٸم ۇيىمداسقان قىلمىسقا قارسى كٷرەس دەپارتامەنتٸنٸڭ ٶكٸلٸ قۋاندىق الپىستىڭ ايتۋىنشا, تەرگەۋ بارىسىندا الىنعان اقپارات ۇلتتىق قاۋٸپسٸزدٸك كوميتەتٸمەن بٸرلەسٸپ, وسى قىلمىستىق توپتىڭ قازاقستان اۋماعىندا جاساعان ٶزگە دە اۋىر قىلمىستارىن اشۋعا مٷمكٸندٸك بەرگەن.
اتاپ ايتقاندا, 2025 جىلعى تامىزدا الماتىدا قالا تۇرعىنىن ٶلتٸرۋگە وقتالعان قىلمىستىق توپتىڭ كيللەرلەرٸنٸڭ بٸرٸ ۇستالعان. بۇل ٸس بويىنشا تەرگەۋ اياقتالىپ, ماتەريالدار سوتقا جولدانعان.
سونىمەن قاتار قازاقستان, تٷركييا جەنە گرۋزييا اۋماعىندا كەزەڭ-كەزەڭٸمەن جٷرگٸزٸلگەن ارنايى وپەراتسييا بارىسىندا الماتىدا اتالعان قىلمىستىق قۇرىلىمنىڭ بٸرنەشە مٷشەسٸ قولعا تٷستٸ. تەرگەۋ مەلٸمەتٸنشە, ولار قارۋ قولدانىلعان بٸرنەشە شابۋىلعا قاتىسى بار دەگەن كٷدٸككە ٸلٸنگەن.
سونداي-اق گرۋزييادا دا ترانسۇلتتىق قىلمىستىق قۇرىلىممەن بايلانىسى بار جەنە بٸرنەشە اۋىر قىلمىسقا قاتىسى بولۋى مٷمكٸن كٷدٸكتٸلەر ۇستالدى.
قازٸر قۇقىق قورعاۋ ورگاندارى بەلگٸلٸ بولعان بارلىق قىلمىستىق دەرەكتەر بويىنشا دەلەلدەمەلەر جيناپ, ٸسكە قاتىسى بار ٶزگە تۇلعالاردى انىقتاپ جاتىر. سونىمەن قاتار توپتىڭ ۇيىمداستىرۋشىسىن قولدانىستاعى زاڭناماعا سەيكەس جاۋاپكەرشٸلٸككە تارتۋ باعىتىنداعى جۇمىستار جالعاسۋدا.
